Tv Gurra: Gjimnazi i Kërçovës në kolaps administrativ? Zoti na ndihmoftë !

Pas shkarkimit të drejtorit Lulzim Sadiku, Gjimnazi i Kërçovës po përballet me një situatë serioze administrative, pasi ende nuk është emëruar asnjë person tjetër në krye të institucionit.

Problemi kryesor qëndron në faktin se aktualisht askush nuk ka të drejtë nënshkrimi. Kjo situatë rrezikon funksionimin normal të shkollës dhe mund të sjellë pasoja konkrete: profesorët mund të mbeten pa paga për muajin prill , procedurat për ekskursionin e nxënësve nuk mund të vazhdojnë, ndërsa po afrohet përfundimi i vitit shkollor dhe maturantët janë ende në proces mësimor.

Gjithashtu, çdo nxënës apo profesor që ka nevojë për një dokument zyrtar përballet me mungesën e një autoriteti që mund ta nënshkruajë atë.
Është shqetësuese që një institucion arsimor me rëndësi kaq të madhe për qytetin të vihet në një gjendje të tillë, vetëm për shkak të vendimeve që perceptohen si të motivuara nga inate personale apo kalkulime politike.

Arsimi nuk duhet të jetë arenë e përplasjeve politike. Është koha që politika të tërhiqet nga ndërhyrjet në institucionet arsimore dhe t’i lihet hapësirë Këshillit të Shkollës dhe stafit të profesorëve të vendosin për udhëheqjen e shkollës. Kjo do të ishte një zgjidhje më demokratike, më funksionale dhe më e drejtë.

Po aq shqetësues mbetet fakti se deri më tani nuk ka asnjë reagim publik nga këshilltarët komunalë të Vlen – it apo subjektet politike për këtë situatë në Kërçovë.
Kjo nuk është thjesht çështje e një drejtori apo pozite, por e dinjitetit të gjimnazit, nxënësve dhe profesorëve.

/tvgurra