VLEN me akuza ndaj BDI-së !
Koalicioni opozitar VLEN ka reaguar me tone të ashpra ndaj Bashkimi Demokratik për Integrim (BDI), duke e akuzuar këtë subjekt për, siç thuhet, “kapje nga individë të etur për pushtet” dhe mungesë të reformave të brendshme.
Në reagimin e tyre, VLEN kritikon veçanërisht ish-ministrin e Punëve të Jashtme Bujar Osmani, duke ironizuar vizitën e tij në Bruksel dhe deklaratat për mbrojtjen e të drejtave të shqiptarëve në Maqedonia e Veriut. Sipas tyre, Osmani nuk ka legjitimitet të flasë në emër të shqiptarëve, duke përmendur edhe rezultatin e tij zgjedhor në komunën e Çairit, transmeton Zhurnal.mk.
VLEN thekson se gjatë 22 viteve në pushtet, në bashkëpunim me partitë maqedonase, Osmani ka kaluar rreth 3.700 ditë në funksione ministrore dhe pozita të larta shtetërore. Sipas tyre, kjo dëshmon për një lidhje të fortë me pushtetin dhe, siç pretendojnë, për një tendencë për ta mbajtur atë me çdo kusht.
Akuza të ngjashme adresohen edhe ndaj Blerim Bexheti, për të cilin VLEN thotë se ka mbi 15 vite në funksione publike, përkatësisht rreth 5.500 ditë në poste të ndryshme, përfshirë si kryetar komune, ministër i Drejtësisë dhe funksione të tjera institucionale. Në reagim përmendet edhe përfshirja e tij në strukturat e pushtetit lokal në Shkup.
VLEN akuzon më tej BDI-në për klientelizëm dhe përqendrim në interesa të ngushta partiake, duke pretenduar se narrativa se të drejtat e shqiptarëve mbrohen vetëm përmes përfaqësuesve aktualë të kësaj partie është, siç thuhet, nënçmuese për qytetarët.
Në reagim përmendet edhe lideri i BDI-së, Ali Ahmeti, për të cilin VLEN vlerëson se ka dallim të madh mes rolit të tij në të kaluarën dhe drejtimit aktual të partisë, duke e akuzuar për mungesë të reformave dhe orientim drejt interesave klienteliste.
VLEN gjithashtu pretendon se pa reforma të thella, si në program ashtu edhe në përbërje kadrovike, BDI rrezikon të humbasë mbështetjen dhe të përballet me sfida serioze politike në të ardhmen.
Në fund, koalicioni u bën thirrje anëtarëve të BDI-së që të reflektojnë mbi drejtimin aktual të partisë dhe të kërkojnë ndryshime të brendshme.$
/Zhurnal.mk
