Këto janë dy fëmijët që humbën jetën në aksident ! Ngushllime familjes

Eneo Muca, 12 vjeç, dhe Klersi Nikolli, 10 vjeç, janë dy fëmijët që humbën jetën në aksidentin tragjik të ndodhur në Durrës, në lagjen nr. 15, e njohur si ish-Këneta. Ngjarja ndodhi dje rreth orës 14:20, kur tre fëmijë po luanin në trotuar dhe u përplasën nga një automjet tip “Mercedes-Benz ML”, duke shkaktuar vdekjen e dy prej tyre në vend dhe plagosjen e një 8-vjeçari tjetër, i cili ndodhet në Spitalin e Traumës jashtë rrezikut për jetën.

Sipas pamjeve dhe të dhënave hetimore, mjeti ka humbur kontrollin dhe ka përplasur fëmijët, ndërsa drejtuesi Nikoll Radaçi është larguar nga vendi i ngjarjes dhe më pas është arrestuar nga policia. Ai ka rezultuar në gjendje të dehur në momentin e aksidentit, ndërsa në dëshminë e tij ka pranuar konsumimin e alkoolit dhe ka shprehur pendesë për ngjarjen. Hetimet vijojnë për zbardhjen e plotë të rrethanave dhe përgjegjësive.

Kjo ngjarje e rëndë në Durrës nuk është vetëm një tragjedi familjare, por një pasqyrë e një sistemi që reagon gjithmonë pasi ndodh fatkeqësia, jo përpara saj. Është dështim institucional në kontrollin e drejtuesve problematikë, në sigurinë rrugore dhe në krijimin e hapësirave të sigurta për fëmijët në zona të banuara, por njëkohësisht edhe një pasqyrë shoqërore që shpesh indinjohet për pak ditë dhe më pas hesht. Kjo ngjarje ka shumë fajtor, shoferin, bashkinë Durrës, shtetin, Policinë, por dhe ne si shoqëri!

Në fund, lind edhe një pyetje e pakëndshme për të gjithë, sa tragjedi duhet të ndodhin që reagimi të mos jetë vetëm emocional, por qytetar dhe i qëndrueshëm? Sepse përtej dhimbjes dhe ngushëllimeve për familjet, mungesa e protestës dhe presionit publik e bën zinxhirin e përgjegjësisë edhe më të dobët. Në një shoqëri funksionale, dhimbja nuk mbetet vetëm zi, kthehet edhe në kërkesë llogarie.

/joq