Iniciativa kundër imigracionit mund të miratohet nga votuesit zviceranë

Një iniciativë e re kundër imigracionit në Zvicër pritet të marrë mbështetjen e shumicës së votuesve në referendumin që do të mbahet më 14 qershor. Sipas një sondazhi të fundit, iniciativa e krahut të djathtë e njohur si “Jo për 10 milionë” mund të miratohet nga shumica e qytetarëve, përcjell albinfo.ch.

Sondazhi është realizuar nga grupi mediatik Tamedia më 22 dhe 23 prill, ku janë përfshirë rreth 16 mijë votues. Rezultatet tregojnë se 52 për qind e të anketuarve janë të prirur ta mbështesin këtë iniciativë në votim.

Ndër arsyet kryesore të përmendura nga mbështetësit janë shqetësimet që lidhen me rritjen e imigracionit, përfshirë çështjet e sigurisë, rritjen e kriminalitetit, si dhe presionin që, sipas tyre, po i bëhet tregut të banesave dhe infrastrukturës së rëndësishme publike.

Në anën tjetër, kundërshtarët e iniciativës paralajmërojnë se miratimi i saj mund të rrezikojë marrëveshjet dypalëshe të Zvicrës me Bashkimin Evropian. Ata theksojnë gjithashtu se një vendim i tillë mund të përkeqësojë mungesën e fuqisë punëtore të kualifikuar në vend.

Debati për këtë iniciativë pritet të intensifikohet në javët në vijim, ndërsa qytetarët zviceranë do të vendosin përfundimisht për të ardhmen e saj në referendum.

/Albinfo.ch