Një deponi tjetër ilegale në Kërçovë ! (VIDEO)

“Kjo që po shihni prapa meje është një deponi e cila është krijuar së fundmi dhe është vetëm 5 minuta larg qytetit të Kërçovës. Sipas informacioneve të banorëve, kjo deponi është krijuar për shkak se Komuna e Kërçovës i merr mbeturinat nga deponia ilegale e cila ndodhet brenda qytetit të Kërçovës dhe i sjell këtu, pastaj i mbulon me dhe”, raporton Salije Sadiku Pinjolli – gazetare e TV21.

Deponia është shumë afër fshatit Sërbjan; vendi ka fusha të mbjella, si dhe shtëpiza vikendi ku banorët kalojnë fundjavat. Andaj, banorët duke filluar nga fshati Sërbjan e deri në Pllasnicë janë kundër këtij veprimi të Komunës së Kërçovës dhe kërkojnë të ndërpriten menjëherë aktivitetet e Komunës në këtë pjesë.

FSHATRAT E KOMUNËS SË KËRÇOVËS DHE PLLASNICËS:
“Duke filluar nga fshati Sërbjan e deri në fshatin Pllasnicë, të gjithë banorët jemi kundër këtij veprimi ilegal që Komuna e Kërçovës po ndërmerr ditët e fundit, duke na sjellë mbeturinat nga qyteti në fushat tona. Kjo është një katastrofë ekologjike dhe shkel çdo normë ligjore dhe etike të mbrojtjes së mjedisit. Kërkojmë nga kryetari i Komunës që menjëherë ta ndërpresë sjelljen e mbeturinave këtu.”

Banorët thonë se nëse Komuna nuk ndalon së vepruari, ata do të ndërmarrin masa rigoroze për këtë veprim dhe, me çdo kusht, do ta ndalojnë këtë katastrofë ekologjike.

VIDEO:

/tv21