A do ta ket fatin e Ilir Metës dhe Gruevski ?

Pas humbjes së bujshme të Viktor Orbán-it në zgjedhjet parlamentare të Hungarisë, fati i ish-kryeministrit maqedonas Nikola Gruevski ndodhet sërish në fije të perit.

Kryeministri i ri hungarez, Peter Magyar, ka deklaruar prerazi se vendi i tij nuk do të jetë më një “strehë” për kriminelët e huaj, duke e cilësuar Gruevskin shprehimisht si të tillë dhe duke i hapur rrugën ekstradimit të tij të mundshëm.

Ky zhvillim ngre pyetjen e madhe: a do të përfundojë Gruevski prapa hekurave, ashtu si homologu i tij shqiptar Ilir Meta?
Gruevski u arratis në Hungari në vitin 2018 për t’i shpëtuar burgut, pasi u dënua për blerjen e paligjshme të një makine luksoze. Atij iu dha azil politik brenda një jave me pretendimin se jeta e tij ishte në rrezik.

Që nga ajo kohë, ai ka jetuar në Budapest, ndërkohë që në Maqedoninë e Veriut mbeten aktive dy dënime të tjera: një me një vit e gjysmë muaj dhe një tjetër me nëntë vjet burg, ky i fundit i vlefshëm deri në vitin 2043.

Në Shkup, kryeministri Hristijan Mickoski ka mbajtur një qëndrim të matur, duke theksuar se ligji duhet të zbatohet dhe se, nëse Gruevski kthehet, do të përballet me drejtësinë.

Megjithatë, opozita e udhëhequr nga Venko Filipçe ka hedhur akuza të rënda, duke pretenduar se qeveria po e mbron qëllimisht ish-liderin e saj duke mos dërguar kërkesa të reja për ekstradim.

Sipas LSDM-së, Gruevski ka gëzuar mbrojtje nga një rrjet i fuqishëm mentorësh politikë që përfshin hungarezin Orbán dhe serbin Aleksandar Vučić.

Në rrafshin juridik, ekstradimi mbetet një proces kompleks me dy faza: gjyqësore dhe ministrore. Ekspertët hungarezë sqarojnë se statusi i refugjatit i nënshtrohet rishikimit çdo tre vjet, çka do të thotë se imuniteti i tij nuk është i përjetshëm.

Përtej çështjes së individit, marrëdhëniet mes Shkupit dhe Budapestit janë tensionuar edhe nga aspekti financiar. Opozita maqedonase ka kritikuar ashpër kredinë prej një miliard eurosh të marrë nga Hungaria, duke pretenduar se paratë kanë origjinë kineze.

Gjithashtu, janë ngritur padi për skema të dyshuara të pastrimit të parave përmes mediave maqedonase me fonde hungareze. Me ndryshimin e pushtetit në Budapest, po perëndon epoka ku Hungaria shërbente si strehë e sigurt për figurat politike të dënuara.

Ashtu si në rastin e Ilir Metës në Shqipëri, ku drejtësia po tregon se askush nuk është i paprekshëm, edhe për Gruevskin orët e lirisë në ekzil duken të numëruara.

/tesheshi.com/