Intensifikohet rivaliteti Greqi–Turqi; blindojnë ushtritë me armatime të reja?

Miratimi formal i blerjes së dy fregatave italiane të tipit Bergamini për Marinën Ushtarake të Greqisë pritet të jetë vetëm çështje kohe, ndërsa Athina vijon zbatimin e programit 12-vjeçar të armatimeve në një moment kur debati për autonominë mbrojtëse në Bashkimin Evropian po fiton peshë.

Pas një serie negociatash dhe në kushtet e një konkurrencë të fortë rajonale, pala greke ka siguruar përparësi për këto anije të ndërtuara në Itali, të cilat pritet të integrohen në flotën e saj duke filluar nga fundi i vitit 2028.

Megjithatë, marrëveshja mes Greqisë dhe Italisë nuk ka qenë e lehtë, pasi gjendja e mirë operacionale e fregatave i ka bërë ato të kërkuara edhe nga vende të tjera, për shkak të fleksibilitetit të lartë dhe kapaciteteve strategjike që ofrojnë.

Sipas planit aktual, nëse Italia nuk ndryshon orientimin e saj strategjik, dorëzimi i anijeve do të bëhet gradualisht: secila fregatë do t’i kalojë Greqisë pasi kantieret italiane të përfundojnë ndërtimin e një anijeje të re për flotën e tyre.

Mes fregatave dhe raketave, intensifikohet rivaliteti Greqi–Turqi;
Kjo qasje i lejon Italisë të mbështesë industrinë e saj vendase dhe të rinovojë flotën detare, ndërsa njëkohësisht rrit praninë operacionale në Mesdheun juglindor.

Ndërkohë, kërkesa për produktet e industrisë italiane të mbrojtjes po rritet, përfshirë edhe nga Turqia. Sipas raportimeve, Ankaraja po shqyrton mundësinë e bashkëpunimit me Italinë për të përmirësuar mbrojtjen ajrore, në një kohë kur ka evidentuar boshllëqe në kapacitetet e saj pas zhvillimeve të fundit rajonale.

Sipas Bloomberg, Turqia synon të sigurojë sistemin e mbrojtjes ajrore SAMP/T, i zhvilluar nga konsorciumi franko-italian Eurosam, i cili mund të plotësojë mungesën e sistemeve të avancuara pas kufizimeve që lidhen me përdorimin e S-400.

Mes fregatave dhe raketave, intensifikohet rivaliteti Greqi–Turqi;
Ky sistem pritet të jetë pjesë e një strukture më të gjerë të mbrojtjes ajrore shumë-shtresore, të cilën Turqia synon ta zhvillojë sipas modelit të sistemeve të ngjashme në rajon.

Megjithatë, përpjekjet e mëparshme të Ankarasë për të siguruar këtë sistem janë përballur me rezerva nga Franca. Në këtë kontekst, Turqia po shqyrton alternativa bashkëpunimi më të thelluara me Italinë, përfshirë edhe prodhimin e përbashkët.

Zhvillimet ndodhin në një moment kur Ankaraja synon të forcojë rolin e saj në ekosistemin evropian të mbrojtjes, ndërsa paralelisht investon në rritjen e kapaciteteve të brendshme, përfshirë prodhimin e sistemeve raketore dhe mbrojtjes ajrore.

/ms