Detaja nga vrasja e shqiptarit në Spanjë ! Pasi e vranë e futën në thes

Detaje tronditëse kanë dalë në dritë nga vrasja e 31-vjeçarit shqiptar Miklovan Dakaj në Spanjë, një krim që zbardh brutalitetin e errët të botës së krimit shqiptar në vendet e Europës, ku lufta për territor duket se vjen e bëhet më e egër.

Sipas mediave spanjolle, trupi i të riut u gjet i futur në një thes, i lidhur dhe i rënduar me blloqe betoni, për t’u fundosur në ujërat e rezervuarit Casasola, në zonën e Almogía-s, Málaga. Për muaj me radhë ai rezultonte i zhdukur, ndërsa familjarët kishin denoncuar se ishin vënë nën presion për të ndërprerë kërkimet.

Zhdukja e Dakajt ishte raportuar fillimisht nga ish-partnerja e tij, pasi ai humbi çdo kontakt më 13 maj 2025 e më pas nga nga familjarët përmes JOQ Albania ku dhe ngjarja mori zë. Hetimet zbuluan se ai kishte dalë për një takim me disa persona që i kishin premtuar punë si truprojë, por që në fakt rezultoi të ishte një kurth fatal. Ai u pa për herë të fundit teksa hipte në një automjet me dy prej të dyshuarve, duke u nisur drejt një zone malore pranë rezervuarit.

Fillimisht rasti u trajtua si zhdukje e dyshimtë, por gjithçka mori kthesë dramatike pesë muaj më vonë, kur një kalimtar zbuloi rastësisht thesin me trupin e pajetë. Pavarësisht gjendjes së avancuar të dekompozimit, viktima u identifikua përmes tatuazheve.

Hetimet çuan në identifikimin e një automjeti Peugeot 208 të marrë me qira në Barcelonë, i cili u përdor nga autorët në ditët para dhe gjatë krimit. Gjurmimi i këtij automjeti nxori në pah përfshirjen e tre personave: dy shtetas shqiptarë, të moshës 36 dhe 45 vjeç, si dhe një grua, e cila dyshohet se ka luajtur rol kyç në organizimin e lëvizjeve.

Dy prej të dyshuarve janë arrestuar dhe ndodhen në burg të akuzuar për vrasje, ndërsa roli i gruas mbetet ende nën hetim. Sipas autoriteteve, viktima ishte vrarë, lidhur dhe më pas hedhur në rezervuar, në një përpjekje për të zhdukur çdo gjurmë.

Edhe pse nuk ka ende një konfirmim zyrtar, dyshimet kryesore lidhen me një përplasje mes grupeve kriminale, ndoshta në kuadër të trafikut të drogës në Costa del Sol. Hetimet janë marrë nga njësitë e specializuara kundër krimit të organizuar në Málaga, të cilat, përmes analizës së kamerave të sigurisë dhe të dhënave telefonike, kanë rindërtuar lëvizjet e fundit të viktimës.

Me vendim gjykate, një nga autorët e dyshuar është lënë në burg pa të drejtë lirimi me kusht, ndërsa për tjetrin është caktuar një garanci prej 25 mijë eurosh. Ndërkohë, autoritetet vijojnë hetimet për të zbardhur plotësisht këtë krim të rëndë që ka tronditur komunitetin.

/joq