Intervistë me politikanen kërçovare nga Zvicra Shasime Osmani

Nga rrënjët në Kërçovë deri te një fitore që jehon në Bernë, rrugëtimi i Shasime Osmanit është dëshmi se diaspora shqiptare po fiton gjithnjë e më shumë zë në jetën politike dhe publike të Zvicrës. E re, e artikuluar dhe me vizion të qartë për barazi e drejtësi sociale, ajo përfaqëson një brez që nuk mjaftohet vetëm me praninë në shoqëri, por synon ndikim të vërtetë në vendimmarrje.

Fitorja e saj në kantonin e Bernës nuk është vetëm një arritje personale, por edhe një sinjal i fuqishëm për fuqizimin e të rinjve me prejardhje migrante. Në një bisedë për Portalb.mk, Shasime Osmani flet për rrugëtimin, sfidat që shoqërojnë angazhimin politik dhe vizionin për një shoqëri më të barabartë, më të drejtë dhe më përfshirëse.

Portalb.mk: Si e vlerësoni këtë fitore historike në kantonin e Bernës dhe çfarë simbolike ka për përfaqësimin e diasporës shqiptare në politikën zvicerane?
Shasime Osmani: Këtë fitore e vlerësoj shumë dhe ndihem e nderuar të përfaqësoj komunitetin shqiptar si dhe migrantë të tjerë. Përfaqësimi krijon dukshmëri, prandaj kjo zgjedhje nuk është vetëm simbolike, por edhe një përgjegjësi e madhe.

Portalb.mk: Duke qenë se jeni rritur dhe formuar në Zvicër, cilat janë dallimet kryesore që shihni mes kulturës politike dhe funksionimit të institucioneve në Zvicër dhe në Maqedoninë e Veriut?
Shasime Osmani: Sinqerisht, kam shumë pak njohuri për politikën në Maqedoninë e Veriut. Një gjë mund ta them me siguri: në parlamentet zvicerane nuk debatojmë për gjuhët zyrtare, është e vetëkuptueshme që secili mund të flasë gjuhën e tij.

Portalb.mk: Cilat sfida konkrete has një e re me prejardhje migrante për t’u integruar dhe për të depërtuar në politikën zvicerane?
Shasime Osmani: Kush kandidon për zgjedhje dhe, në rastin më të mirë, zgjidhet, ekspozohet publikisht. Vijnë lavdërime, kritika, madje edhe racizëm, dhe për këtë duhet të jesh i përgatitur.

Portalb.mk: Si e shihni rolin e rinisë shqiptare në diasporë, a janë mjaftueshëm të përfshirë në proceset politike dhe shoqërore, apo ende ekzistojnë barriera?
Shasime Osmani: Ne jemi patjetër gati! Brezi im ka potencialin që, nëse ka interes, të kandidojë për poste publike. Në çdo zgjedhje ka gjithmonë persona me prejardhje shqiptare që kandidojnë.

Portalb.mk: Nga pozita juaj në Partinë Socialdemokrate (SP), cilat do të jenë prioritetet tuaja politike, sidomos në raport me çështjet e barazisë, integrimit dhe drejtësisë sociale?
Shasime Osmani: Në Zvicër na duhet një proces i njëtrajtshëm i natyralizimit dhe një qasje më e mirë në arsim për të gjithë. Qasja në arsim krijon edhe më shumë barazi mes gjinive. Dhe në krye të prioriteteve të mia është lufta kundër dhunës ndaj grave.

Portalb.mk: Çfarë mesazhi do t’u dërgonit të rinjve në Maqedoninë e Veriut që hezitojnë të përfshihen në politikë, duke parë përvojën tuaj si pjesë e një sistemi më funksional, por edhe të rinjve shqiptarë në diasporë?

Shasime Osmani: Politika është shumë interesante dhe ka ndikim të madh në jetën tonë të përditshme. Por duhet patjetër të kesh interes për të. Nëse ju intereson politika, provojeni, dhe nëse nuk ju pëlqen, mund të tërhiqeni sërish.

/portalb