BDI rrit ndjeshëm pronat: Blen objekt pesëkatësh në Tetovë ?

Bashkimi Demokratik për Integrim (BDI) ka shënuar rritje të konsiderueshme të pronave gjatë vitit 2022, duke zgjeruar dukshëm asetet në pronësi të saj, raportojnë burime mediatike.

Sipas të dhënave, partia ka blerë një ndërtesë pesëkatëshe në qendër të Tetovës, me sipërfaqe rreth 1.200 metra katrorë. Për këtë pronë, BDI deklaron se është financuar përmes një kredie. Megjithatë, objekti, i vendosur në një lokacion atraktiv pranë Telekomit, aktualisht rezulton i pashfrytëzuar dhe pa indikacione se jepet me qira.

Përveç kësaj, BDI posedon selinë partiake në Çair të Shkupit, si dhe rreth 430 metra katrorë në qendrën tregtare “Mavrovka”, ku funksionon Qendra Analitike e partisë. Prona të tjera të saj ndodhen edhe në Pllasnicë dhe Dibër, të cilat përdoren si shtabe lokale.

Ndërkohë, objekti i njohur në Reçicë të Vogël, ku është e vendosur selia qendrore e partisë, nuk është në pronësi të saj, por funksionon me qira.
Sipas një hulumtimi të BIRN, përveç pronave të destinuara për aktivitete partiake, disa subjekte politike në vend zotërojnë edhe pasuri të tjera, si toka kullotash, objekte turistike dhe banesa, duke ngritur pikëpyetje për përdorimin real të tyre.

Në këtë kontekst, në disa vendime të saj, Gjykata Kushtetuese e Maqedonisë së Veriut ka theksuar se partitë politike nuk janë krijuar për të grumbulluar pasuri apo për të funksionuar si biznese, por për të përfaqësuar qytetarët dhe vlerat shoqërore.

/zhurnal