Simpozium në Zvicër mbi gjuhën shqipe në Kërçovë

Shoqata Kulturore Kërçova–Zvicër ka organizuar një simpozium me temë “Gjuha shqipe në rrethin e Kërçovës”, duke mbledhur studiues, profesorë dhe anëtarë të komunitetit shqiptar në diasporë.

Në këtë aktivitet referuan emra të njohur si Dr. Avzi Mustafa dhe Dr. Qemal Murati, të cilët trajtuan zhvillimin historik të gjuhës shqipe në rajonin e Kërçovës, si dhe sfidat aktuale me të cilat përballet ajo në ditët e sotme.

Simpoziumi u mbajt në kuadër të Mbledhjes Gjenerale të shoqatës dhe zgjati nga ora 14:30 deri në 17:30. Gjatë diskutimeve u theksua rëndësia e ruajtjes së gjuhës shqipe si një nga shtyllat kryesore të identitetit kombëtar, veçanërisht në diasporë.
Në kumtesat e tyre, ligjëruesit paraqitën dëshmi historike dhe analiza shkencore mbi rrugëtimin e gjuhës shqipe në këtë trevë, duke vënë në pah kontributin e brezave në ruajtjen dhe zhvillimin e saj ndër vite.

Organizatorët e vlerësuan këtë simpozium si një hap të rëndësishëm drejt forcimit të vetëdijes kulturore dhe gjuhësore, duke theksuar rolin e diasporës në promovimin dhe trashëgiminë e gjuhës shqipe ndër breza. Organizimi u konsiderua i suksesshëm dhe në nivel të lartë, falë angazhimit të kryesisë së shoqatës dhe kryetarit Resul Mehmeti.

/tvgurra