44 raste të reja: Rritje e theksuar e infeksioneve me Covid-19 në Zvicër

Gjatë 24 orëve të fundit, në Zvicër dhe Lihtenshtajn janë raportuar 44 infeksione të reja me virusin e koronës, njofton BAG, transmetojnë mediat z vicerane. Ky numër paraqet një ngritje të konsiderueshme në krahasim me atë të raportuar ditën e djeshme, (e martë) kur kanë qenë gjithsej 22 raste.

Të hënën kanë qenë 18 raste të reja infeksioni ndërsa të dielën kishin qenë të raportuara 35 raste të reja, plus 14 raporte të mbetura nga prilli dhe maji, tranmseton albinfo.ch. Të shtunën kanë qenë të raportuara 26 raste të reja ndërsa të premten dhe të enjten janë regjistruar nga 17 raste infeksioni.

Nisur nga trendi i rritjes së infeksioneve që është regjistruar ditëve të fundit, ministri i shëndetësisë, Alain Berset ka thënë sot në konferencën pë media, se duhet parë me kujdes se ku janë shkaqet.

Deri më tani në Zvicër ka pasur 31.376 raste të konfirmuara nga laboratori Covid-19, njofton Zyra Federale e Shëndetit Publik (BAG), përcjell albinfo.ch. Për çdo 100.000 banorë deri më sot ka pasur 366 raste infeksioni.

Deri më tani, në Zvicër dhe në Principatën e Lihtenshtajnit, sipas BAG kanë vdekur 1682 perosna që ishin testuar pozitivisht për Covid-19.

Numri i testeve të kryera për Sars-CoV-2, (shkaktar i Covid-19), deri tani ka arritur në 523.909. Në shtatë përqind të këtyre testeve, rezultati ka qenë pozitiv.

/albinfo