Dënohet kosovarja: ka mashtruar me 1.1 milion franga pensionistin zviceran

Si është e mundur që një burrë i dha një gruaje para për vite me radhë, bazuar në gënjeshtra, derisa humbi rreth 1.1 milion euro? Kjo pyetje u diskutua në procesin gjyqësor për mashtrim në Gjykatën e Qarkut të Bülach-ut.

E pandehura është një 64-vjeçare nga Kosova, e cila jeton në Zvicër dhe ka tre fëmijë e gjashtë nipër e mbesa. Sipas prokurorisë, ajo për vite me radhë mashtroi një pensionist zviceran në fund të të 70-tave, me të cilin kishte krijuar marrëdhënie besimi që nga viti 2001.

Mashtrimet filluan në vitin 2011, kur ajo kërkoi një kredi prej 30,000 frangash për restorantin e saj në vështirësi. Më pas ajo vazhdoi të kërkonte para duke shpikur histori për aksidente, qëndrime në spital, borxhe tatimore, divorc apo arrestime. Ajo pretendonte gjithashtu se kishte një shtëpi në Kosovë që do ta shiste për t’i kthyer paratë.

Mes viteve 2012–2016, pensionisti i dha gjithsej rreth 1.1 milion euro, duke përfunduar vetë në falimentim. Ai madje udhëtoi disa herë në Sarajevë për t’i dorëzuar para në dorë.

Në vitin 2024, kur gruaja u përpoq përsëri të merrte para, viktima bëri kallëzim penal. Ajo u arrestua gjatë dorëzimit të parave dhe prokuroria kërkoi pesë vjet burg dhe dëbim nga Zvicra për dhjetë vjet.

Gjykata e Bülach e shpalli fajtore për mashtrim të shumtë dhe e dënoi me 30 muaj burgim (9 muaj për t’u vuajtur dhe 21 muaj me kusht) si dhe me dëbim nga Zvicra për shtatë vjet. Gjykata konstatoi se ajo kishte vepruar me mjeshtëri dhe kishte shfrytëzuar cenueshmërinë e viktimës, e cila humbi kursimet e pensionit.

/albinfo