A duhet të rriten pagat në Maqedoni si mendoni ?

Në Maqedoninë e Veriut pragu i varfërisë për pagë është 31.200 denarë, ndërsa 154.408 të punësuar marrin rreth 30.000 denarë. Nga gjithsej 705.165 të punësuar, rreth 22% jetojnë me të ardhura nën pragun e varfërisë. Kjo tregon se shumë punëtorë, pavarësisht se punojnë, jetojnë në varfëri.

Sipas Eurostat, në vitin 2024 rreth 16.2% e popullsisë së BE-së ishte në rrezik varfërie, ndërsa përqindja më e lartë u regjistrua në Turqi dhe Maqedoninë e Veriut (22.2%). Në vend, paga mesatare neto është 46.889 denarë, ndërsa mbi një e treta e punëtorëve marrin paga nën mesataren.

Aktualisht paga minimale është 24.400 denarë (397 euro), më e ulëta në rajon. Sindikatat kërkojnë rritjen e saj në 600 euro dhe rritje të pagave të tjera me të paktën 6.000 denarë. Qeveria, ndërkohë, planifikon vetëm një rritje prej rreth 1.667 denarësh.

Ekspertët paralajmërojnë se nëse paga minimale nuk rritet ndjeshëm, vendi rrezikon të humbasë edhe më shumë punëtorë, pasi shumë të rinj po largohen drejt vendeve evropiane ku pagat janë shumë më të larta.

/zhurnal