Emiratet e Bashkuara Arabe do të paguajnë për hotelet dhe ushqimet për turistët

Turistët dhe pasagjerët e bllokuar në Emiratet e Bashkuara Arabe për shkak të mbylljes së aeroporteve do ta kenë të mbuluar nga shteti koston e akomodimit. Lajmi është konfirmuar nga Department of Culture and Tourism – Abu Dhabi (DCT Abu Dhabi).

Në një deklarate drejtuar hoteleve, institucioni u ka kërkuar strukturave akomoduese të zgjasin qëndrimin e vizitorëve që kanë arritur datën e largimit, por nuk mund të udhëtojnë për arsye jashtë kontrollit të tyre. Sipas njoftimit, shpenzimet e qëndrimit të zgjatur do të mbulohen nga DCT Abu Dhabi.

Zhvillimi vjen pasi më herët agjencia shtetërore e lajmeve WAM raportoi se General Civil Aviation Authority (GCAA) ka marrë përsipër shpenzimet e ushqimit dhe akomodimit për mijëra pasagjerë të mbetur në pritje, pas anulimit të fluturimeve dhe mbylljes së përkohshme të hapësirës ajrore në të gjithë vendin.

Sipas autoriteteve, rreth 20,200 pasagjerë janë prekur nga riplanifikimi i fluturimeve. Për ta janë siguruar strehim i përkohshëm, ushqime dhe pije, si dhe asistencë për riprenotime, në përputhje me planet operacionale të miratuara.

Aeroportet në mbarë Emiratet u mbyllën të shtunën pasdite, në sfondin e përshkallëzimit të tensioneve rajonale mes SHBA-së, Izraelit dhe Iranit, ku sulmet dhe kundërpërgjigjet me raketa shkaktuan viktima dhe rreziqe në disa zona të rajonit.

Ndërkohë, edhe kompani private kanë ofruar ndihmë për të prekurit. Arabnb Homes, një kompani e dhënies me qira të apartamenteve për pushime, njoftoi se ka hapur falas disa nga ambientet e saj për pasagjerët e bllokuar në Dubai. Sipas bashkëthemeluesit Hreshan Raheja, iniciativa u frymëzua nga një rast personal dhe nxiti edhe pronarë të tjerë të bashkohen në këtë nismë.

Edhe kompani të tjera, përfshirë Danube Properties, kanë ofruar akomodim falas, duke i dhënë përparësi familjeve me fëmijë dhe të moshuarve, ndërsa situata në rajon vijon të mbetet e tensionuar.

/alsatm