Kërçovë: Banesë shtetërore në gjendje të rrezikshme !? (VIDEO)

Kjo zonjë është Vesna Spasenosvka e cila jeton në një nga banesat e shtetit në Çarshinë e Kërçovës.
Vesna këtë banesë e ka marr me qira në vitin 2004 nga Shoqëria Aksionare për ndërtimin dhe menaxhimin me banesat shtetërore. Ka 20 vite që jeton aty, por vitin e fundit kjo banesë është rrënuar pothuajse tërësisht. E më e rrezikshme është bërë pjesa e tavanit e cila ka filluar të bie dhe nga brenda duket qielli jashtë.

“Tavani këtu ra tani para një muaji nga shirat, ndërsa atje në dhomën tjetër vitin e kaluar. Unë kërkoj ta rinovojnë ose të me japin banesë adekuate, ju thash më herët më thanë unë të bëjë kërkesë dhe ta dorëzoj në Shkup në Ministrinë e Sizit, por kush do ta lexoj, unë kam dërguar më herët dy apo 3 herë dhe nuk kam marr asnjë përgjigje”, tha Vesna Spasenovska.

Vesna thotë se ka kërkuar ta rinovojë por nuk e kanë lejuar. Ajo thotë se është e gatshme edhe ta blejë ose edhe t’ia gjejnë një banesë tjetër.
“Kjo filloi të më bie, shkoj atje kërkoj që ta rinovojë vetë por nuk më lejojnë, thonë se duhet të hapet tender, kot po shkoj vetëm më thonë do të bëhet nuk ka tender”, deklaroi ajo.

Kjo banesë është zonë e mbrojtur trashëgimore dhe në vitin 2014 me projektin për rinovim nga qeveria duhej të rinovoheshin dyert dritaret dhe fasada por edhe pse e matën nuk u ndërmor asgjë. Nga Shoqëria Aksionare për ndërtim dhe menaxhim me banesat shtetërore, filiali në Kërçovë, thonë se janë të njoftuar me gjendjen e banesës së zonjës në fjalë dhe premtojnë zgjidhje.

“Jemi të njoftuar me gjendjen e banesës së zonjës në fjalë e kemi vizituar dhe i kemi ofruar të bëjë kërkesë për një banesë tjetër. Sa i takon rinovimit i kemi njoftuar edhe zyrën në Shkup, tani është përzgjedhur kompania për rinovimin e këtyre banesave dhe shumë shpejt do të rinovohet”, thotë Shoqëria Aksionare për ndërtim dhe menaxhim me banesat shtetërore.

Ndryshe në Kërçovë ka 100 banesa shtetërore që i menaxhon zyra në Kërçovë dhe nga ato vetëm dy janë të lira për banim. Pagesa mujore në këto banesa që kryesisht janë për familjet me rrezik social janë 200 deri në 800 denarë.

VIDEO:

/tv21