Sulme amerikane e izraelite në zona të ndryshme të Iranit

Shtetet e Bashkuara të Amerikës dhe Izraeli ndërmorën sulme në zona të ndryshme të Iranit, përfshirë edhe kryeqytetin, Teheran. Sulmet kishin në shënjestër figura të larta iraniane, përfshirë Udhëheqësin Suprem Ajatollah Ali Khamenei, Shefin e Shtabit të Forcave të Armatosura dhe Presidentin. Mediat iraniane theksuan se Khamenei nuk është në Teheran dhe se është zhvendosur në një lokacion të sigurt, ndërsa presidenti është gjallë e shëndosh.

Presidenti amerikan, Donald Tramp tha qëllimi i sulmeve është që të mbrohen amerikanët duke eliminuar kërcënimin nga regjimi iranian. Ai paralajmëroi shkatërrim të tërësishëm të industrisë iraniane të raketave.

“Ne do të shkatërrojmë raketat e tyre dhe do ta rrafshojmë industrinë e tyre të raketave. Do të shkatërrohet plotësisht. Do ta shkatërrojmë marinën e tyre. Do të sigurohemi që përfaqësuesit terroristë të rajonit të mos mund ta destabilizojnë më rajonin ose botën, të sulmojnë forcat tona dhe të mos përdorin më bombat e tyre të improvizuara duke plagosur rëndë dhe vrarë mijëra e mijëra njerëz, përfshirë shumë amerikanë”, tha Donald Tramp, President i SHBA-së.

Kryeministri izraelit tha se veprimi i përbashkët SHBA-në synon të krijojë kushte që populli iranian të marrë në dorë fatin e vet.
“Po e bëjmë këtë nën udhëheqjen e guximshme të Presidentit Tramp. Së bashku me Shtetet e Bashkuara, do ta godasim fort regjimin terrorist dhe do të krijojmë kushte që do t’i lejojnë popullit të guximshëm iranian të heqë qafe regjimin vrasës”, u shpreh Benjamin Netanjahu, Kryeministër Izraelit.
Televizioni iranian publikoi pamje që tregonin shkatërrimin në Teheran pas sulmeve SHBA-Izrael.

Irani deklaroi se sulmet e Shteteve të Bashkuara të Amerikes dhe Izraelit shkelin ligjin ndërkombëtar dhe përbëjnë agresion. Ministria e Jashtme iraniane kërkoi nga Këshilli i Sigurisë të Kombeve të Bashkuara të ndërmarrë masa urgjente për ballafaqim me paqen dhe sigurinë e prishur ndërkombëtare. “Historia dëshmon se Irani asnjëherë nuk është dorëzuar përballë agresionit të huaj. Edhe kësaj radhe, përgjigja e kombit iranian do të jetë i vendosur dhe do t’i detyrojë agresorët që të pendohen për krimin e tyre”, thuhet në njoftimin e Ministrisë së Jashtme Iraniane.

/Alsat.mk