Kërçova sot do të shpallet “Qytet i Kulturës 2026″ reagon BDI Dega Kërçovë

Sot, në ora 10:30h, në ambientet e Komunës së Kërçovës do të organizohet një event ku Ministri i Kulturës dhe Turizmit, Zoran Lutkov, do ta shpallë Kërçovën “Qytet i Kulturës 2026”.
Deri këtu, gjithçka në rregull.

Por si mund të flasim për “kulturë” kur në të njëjtin event shkelet hapur Ligji për Përdorimin e Gjuhëve dhe anashkalohet gjuha shqipe, gjuha e shumicës së qytetarëve të këtij qyteti?
Kultura nuk ndërtohet mbi përjashtim.
Respekti institucional nuk është çështje vullneti, por detyrim ligjor.

U bëjmë apel publik dhe të drejtpërdrejtë gazetarëve dhe mediave shqiptare që do të marrin pjesë në këtë event:
Mos heshtni.
Parashtroni pyetje për Ministrin dhe Kryetarin e Komunës:
— Pse nuk respektohet Ligji për Përdorimin e Gjuhëve?
— Pse gjuha shqipe anashkalohet në një qytet si Kërçova, ku shqiptarët përbëjnë shumicën e popullsisë?
— Si mund të flitet për kulturë, kur nuk respektohet gjuha e shumicës së qytetarëve?

Heshtja sot do të thotë normalizim i diskriminimit nesër.
Kërçova meriton respekt.
Shqiptarët në Kërçovë meritojnë trajtim të barabartë.
Ligji nuk është dekor, është obligim.
Mos lejoni që ky precedent të kalojë pa u sfiduar publikisht.

/ms