Maqedoni numri i të konfirmuarve me korona tejkaloi pesë mijë!

Për 24 orë në vend vdiqën 11 persona nga virusi KOVID-19, që është numri më i madh dhe për herë të parë numër dyshifror prej fillimit të epidemisë para katër muajve. Raste të reja të konfirmuara prej dje janë edhe 185 nga 1364 testime, ndërsa më shumë se gjysma (96) janë në Shkup. Numri i të diagnostikuarve arriti në 5005.

Në mesin e të infektuarve janë edhe kryetari i Qytetit të Shkupit, Petre Shilegov dhe nëna e liderit të VMRO-DPMNE-së, Hristian Mickoski. Pozitivë me KOVID-19 me pasqyrë më të lehtë dhe mesatare klinike, të rritur dhe fëmijë, prej sot do të pranohen edhe në Spitalin e fëmijëve në Kozle.

Nga 11 të vdekurit, tetë ishin pacientë në SPQ “8 Shtatori” të moshës prej 53 deri 76 vjeç. Tre persona vdiqën në spitalet në Kumanovë, Tetovë dhe Shtip, në moshën 78, 63 dhe 62 vjeç. Me këto viktima të fundit të virusit nga buletini i djeshëm i Ministrisë së Shëndetësisë, numri i përgjithshëm i të vdekurve në vend arriti 233.

Pas Shkupit, si vatër më e madhe, më së shumti pozitivë ka në Strugë (20), Dibër (18), Tetovë (14), tetë në Resnjë, shtatë në Ohër, katër në Shtip, tre në Kërçovë, nga dy në Kumanovë, Veles, Manastir, Kavadar, Gostivar dhe Sveti Nikole dhe nga një në Prilep, Kriva Pallnkë dhe Probishtip.

Në buletinin e djeshëm janë regjistruar edhe 41 të shëruar, prej të cilëve më së shumti (29) në Shkup. Raste aktive në vend janë 2.868 prej të cilëve 1.653 në Shkup. Numër treshifror të rasteve aktive ka më Tetovë (316), Kumanovë (229) dhe Shtip (207). Në Shtip janë bërë edhe 77 skrining-teste në kopshte, por nuk ka rate pozitive.

Në mesin e komunave të Shkupit, Çairi ende është në krye të listës me numër më të madh të rasteve aktive (363), ndërsa pasojnë Gazi Baba me 148, Buteli (133), Aerodromi (129), Qendra (126), Saraji (125) dhe Karposhi me 115 raste aktive.

Krahas Klinikës infektive dhe spitalit “8 Shtatori” i cili funksionon si qendër e KOVIDit, për pranim të pacientëve të infektuar me virusin prej sot do të funksionojë edhe Spitali i fëmijëve Kozle.

Ministria e Shëndetësisë dje kumtoi se prej sot ky spital do të pranojë pacientë të rritur me KOVID-19 dhe se në dispozicion do të jenë 60 vende për mjekim spitalor të të rriturve dhe 15 për fëmijë të dyshuar dhe të infektuar me virus. Është paraparë të hospitalizohen pacientë me pasqyrë të lehtë dhe mesatare klinike.

Pacientë të dyshimtë dhe të infektuar me koronavirus po mjekohen edhe në spitalet në Kumanovë, Tetovë, Shtip, Veles, Prilep, Manastir, Ohër, ndërkaq po përgatitet edhe qendër e KOVIDIT në Kavadar.

Kryetari i Qytetit të Shkupit, Petre Shilegov dje pasdite në profilin e tij në Fejsbuk kumtoi se është pozitiv me KOVID-19 dhe se ka pasqyrë të mirë klinike, me temperaturë jo shumë të lartë të trupit dhe pa nevojë për hospitalizim. Theksoi se nuk arriti të mbrohet nga virusi edhe përkundër të gjitha masave që i ndërmori dhe se sinqerisht shpreson që nuk ia k bartë askujt.

“Të nderuar, do të doja t’Ju informoj se edhe përkundër të gjitha masave që u ndërmorën nga ana ime për mbrojtjen time personale dhe të njerëzve rreth meje, megjithatë nuk arrita të vetëmbrohem nga Kovid-19. Sinqerisht shpresoj që virusin nuk ia kam bartur askujt. Kjo është dëshmi se virusi nuk guxon të nënvlerësohet dhe se secili prej nesh duhet pasur kujdes. Ruajuni dhe ruani të tjerët rreth jush”, shkroi Shilegov në Fejsbuk.

Edhe lideri i VMRO-DPMNE-së, Hristian Mickovski informoi se nëna e tij është pozitive me KOVID-19 dhe është në kushte shtëpiake, por se nuk është parë me të për një periudhë më të gjatë sepse është i ekspozuar ndaj rrezikut, nga takimet dhe bisedat e përditshme me qytetarë.

“Ja, edhe tek ne në familje, për fat të keq, e ndjemë drejtpërdrejtë këtë pandemi dhe shpresoj se do ta kalojmë së shpejti”, deklaroi lideri i VMROI-DPMNE-së.

Ai, si edhe partia e tij në kumtesa dje e akuzuan pushtetin e kryesuar nga LSDM për paaftësi për t’u përballur me pasojat nga epidemia, duke treguar për numrat treshifrorë të përditshëm të rasteve të reja dhe për sistemin shëndetësor “të gjunjëzuar”.

Në reagim ndaj akuzave të VMRO-DPMNE-së, LSDM u përgjigj se kujdesi i liderit të tyre Mickoski për shëndetin e qytetarëve është i shtirur, ndërkaq ai me të gjitha veprimet drejtpërdrejtë e rrezikon shëndetin publik.

Dhe përderisa KOVID-19 tek ne bëhet temë e përplajseve partiake në fushatë zgjedhore e cila zyrtarisht akoma nuk ka filluar, pandemia në botë edhe më tej nuk zbehet dhe për 24 orë ka 200.000 raste të reja dhe tetë mijë të vdekur.

Sipas të dhënave të Universitetit “Xhon Hopkins”, numri i përgjithshëm i të infektuarve dje tejkaloi shifrën 8,6 milionë, ndërsa i të vdekurve u rrit në mbi 458 mijë.

SHBA-ja ka më së shumti të infektuar dhe raste të vdekjes – mbi 2,2 milionë të infektuar dhe rreth 119 mijë të vdekur. Në vend të dytë është Brazili, ku numri i të infektuarve tejkaloi një milion (1.038.568), ndërsa vdiqën 49.090 njerëz. Pason Rusia me rreth 568 mijë të infektuar me KOVID-19, India me mbi 380.000 dhe Britania e Madhe me diç më tepër se 303 mijë të infektuar. Në raport me rastet vdekjes, ndërkaq, prapa SHBA-së dhe Brazilit janë Britania e Madhe me 42.546 raste të vdekjes, Italia me 34.561, Franca me 29.620 dhe Spanja me 28.315 viktima nga virusi.

/ts