Prof. Nazif Selimi për manifestimin e organizuar nga Shoqata Kulturore Kërçova – Zvicër

Dhe erdha nga Jagolli i Kërçovës,

t’i përgjigjem dëshirës dhe vullnetit të kësaj pjese të

dhimbëkrenarisë sonë, që të jem në mesin e tyre, atyre që iu mohua kafshata e gojës në atdheun e tyre, e që me shumë mund, qëndresë e shpresë, të rrisin, forcojnë e edukojnë brezat e ri, që të bëhen zot të vetvetes e t’i dalin Zot edhe atdheut të vet.

Falënderoj nga zemra stafin udhëheqës të Shoqatës kërçovare, nën udhëheqjen e zotërinjëve Resul Mehmedi, Dehar Sadiku dhe anëtarëve të tjerë të nderuar, që më thirrën t’ më bëjnë pjesë e kësaj ngjarjeje kulturore.

Kompozimi i udhëheqjes, rrjedhës dhe koloriti i gjithë asaj që ndodhi në këtë mbrëmje, i ngjante një tufe lulesh nga më të bukurat, ku gërshetohej tradita jonë e pasur folklorike; nxitja, trashëgimia, ruajtja dhe kultivimi i këtyre vlerave, si edhe qëllimi i lartë hyjnor i shoqërimit të njerëzve që janë me ideale të përbashkëta.

Qe një mbrëmje ku fytyrat e qeshura dhe të gëzuara të të gjithë pjesëmarrësve shprehnin mall e dashuri, për vendlindjen, mirësinë, shpresën e qëndresën, për ditët e bukura që duhet të vijnë.

Një mbrëmje e këndshme, që është përgatitur me shumë mund, vullnet e përkushtim, e që të përjetohet si një vegim i bukur, me të cilin duhet të rriten e ushqehen brezat në vazhdim.

Urime për suksesin e punës suaj, ju rojet dhe kultivuesit e vlerave tona kombëtare e njerëzore, shëndet dhe suksese edhe në përvjetorët e ardhshëm !