Shoqata Kulturore Kërçova – Zvicër mbajti manifestimin e radhës

Shoqata Kulturore Kërçova–Zvicër mbrëmë përjetoi një nga netët më të bukura dhe më domethënëse, duke organizuar me sukses Manifestimin Tradicional Kërçovar. Nën moderimin e aktorit të mirënjohur kërçovar Rrahim Ramadani dhe Meslia Ramadani, e cila prej disa vitesh e drejton këtë event me shumë profesionalizëm, mbrëmja mori një shkëlqim të veçantë.

Manifestimi u hap me himnin kombëtar, të interpretuar nga këngëtari i njohur kërçovar Naser Ballazhi. Më pas patëm kënaqësinë të dëgjojmë edhe një këngë premierë, e cila u mirëprit ngrohtësisht nga publiku.

Ishte një mbrëmje që nuk bashkoi vetëm njerëz, por zemra. Një natë ku flamuri, kënga, vallja dhe fjala shqipe u bënë një me emocionin dhe krenarinë tonë kombëtare.
Në emër të kryesisë përshëndeti kryetari i shoqatës Resul Mehmedi cili ndër të tjera uroj edhe 17 Shkurtin, ditën e pavaresisë së Kosoves.

Në këtë manifestim patëm nderin dhe respektin të mirëpresim dy personalitete të shquara, të cilët kanë dhënë kontribut të jashtëzakonshëm për shoqërinë tonë kërçovare: profesorin e nderuar të gjuhës shqipe, Nazif Selimi një edukator që ka formuar shumë breza me mençuri, urtësi dhe përkushtim të rrallë – si dhe gazetarin e mirënjohur Sadik Emroja, i cili gjithë karrierën e tij ia ka përkushtuar vendlindjes, duke qenë pranë qytetarëve si gazetar dhe moderator i shumë emisioneve.

Gjatë programit, fjalën përshëndetëse dhe motivuese e mori, si gjithmonë me shumë dinjitet, krenaria e Kërçovës sonë këtu në Zvicër, doktori i nderuar Florim Cuculi.
Grupi Artistik i Shoqatës prezantoi disa valle tradicionale, të interpretuara në mënyrë shumë profesionale. Ky grup mbetet krenaria më e madhe e shoqatës sonë dhe jemi me fat që kemi ata djem e vajza kërçovare që ruajnë dhe trashëgojnë kulturën tonë me aq përkushtim.

Këtë vit vlerësuam edhe kontributin e poetes kërçovare Kendime Sadiku, të cilën e ftuam të marrë pjesë në manifestim. Për shkaqe personale nuk mundi të ishte e pranishme fizikisht, por realizuam një lidhje direkte online. E falënderojmë përzemërsisht dhe i urojmë suksese të shumta në krijimtarinë e saj të bukur edhe në të ardhmen.

Falënderojmë gjithashtu dy talentet kërçovare, të cilat me zërin e tyre fantastik performuan në mënyrë të shkëlqyer: këngëtaret Anila Mahmudi dhe Melisa Selimi e ardhmja e muzikës sonë.
Tradita vazhdoi me këngë me çifteli, ku grupi “Oda Uskana” na dhuroi një atmosferë të veçantë me këngë autentike kërçovare, që përfaqësojnë vlera të jashtëzakonshme për Kërçovën tonë të dashur.

Në fund të mbrëmjes, në skenë u paraqit këngëtarja e mirënjohur Leta, e cila e ngriti atmosferën në një nivel të jashtëzakonshëm, me shumë valle, gëzim dhe energji pozitive që përfshiu të gjithë të pranishmit.

Mirënjohje e thellë shkon edhe për bashkatdhetarët e shumtë që jetojnë dhe veprojnë në Zvicër, të cilët me prezencën e tyre dëshmuan se zemra shqiptare rreh fuqishëm edhe larg atdheut.
Çdo duartrokitje, çdo buzëqeshje dhe çdo emocion ishte dëshmi se rrënjët tona janë të forta dhe se Kërçova jeton në zemrat tona, kudo që ndodhemi.
Ky manifestim nuk ishte thjesht një aktivitet ishte një betim për ta ruajtur dhe trashëguar kulturën tonë brez pas brezi. 🇦🇱

/shoqatakercova