A po i plas në dorë bomba Bilall Kasamit ?

Në politikë, fjalët kanë peshë. E sidomos kur përdoren si “bomba” për të frikësuar, kërcënuar apo për të krijuar panik brenda radhëve të veta.
Sot, në vend që të shohim unitet dhe reflektim, po shohim sulme të hapura dhe të pakuptimta ndaj njeriut që kontribuoi realisht në ngritjen e Lëvizja Besa dhe në pozicionimin e saj si faktor qeverisës.

Edhe një fëmijë i vogël, nëse pyetet, e di se hyrja e Besës në qeveri nuk ishte rastësi. Ishte rezultat i punës, përkushtimit dhe vizionit të Fatmir Limani. Në një periudhë kur shumëkush dyshonte, ai ndërtoi ura, forcoi strukturën dhe e çoi subjektin në një nivel që më parë dukej i paarritshëm.

Atëherë lind pyetja:
Pse gjithë ky sulm ndaj njeriut që e ngriti Lëvizjen?
Në vend të falënderimit dhe respektit për kontributin e tij, shohim paralajmërime për shkarkime nëpër rrjete sociale – një mënyrë jo serioze dhe jo dinjitoze për të trajtuar çështje kaq të rëndësishme politike. Politika nuk bëhet me statuse, as me kërcënime publike, por me vendime të qarta, argumente dhe përgjegjësi.

Dhe kur dikush paralajmëron “bombë” politike për ta goditur një figurë kyçe të subjektit të vet, duhet të jetë i sigurt se ajo bombë nuk do t’i plasë në dorë.
Sepse kur godet figurën që ka sjellë legjitimitet dhe sukses, rrezikon të minosh themelet mbi të cilat qëndron vetë suksesi yt.

Pyetja që sot shtrohet hapur është:
A po dëmtohet Lëvizja nga brenda?
Dhe më konkretisht:
A po i plas bomba në dorë atij që mendon se mund ta rishkruajë historinë duke fshirë meritat e të tjerëve?

Koha do ta tregojë. Por një gjë është e sigurt:
Respekti për kontributin nuk është dobësi – është kulturë politike. Dhe kush nuk e kupton këtë, rrezikon të mbetet peng i ambicieve të veta.

/strugatimes