Tv Gurra: Përplasja Limani–Kasami–Azizi: kush e kontrollon realisht pushtetin brenda VLEN-it dhe BESËS ?

Kush është politikisht më i fortë: Fatmir Limani, apo dyshja Bilall Kasami – Adnan Azizi?
Kjo pyetje po shtrohet gjithnjë e më shpesh në tavolinat politike të koalicionit VLEN, përkatësisht brenda Lëvizjes BESA, mëson portali TS.
Fatmir Limani, tashmë thuajse “zyrtarisht”, është distancuar nga Lëvizja BESA dhe është rreshtuar hapur krah kryeministrit Hristijan Mickoski. Pikërisht kjo mbështetje direkte nga kreu i qeverisë përbën burimin kryesor të fuqisë së Limanit, duke e vendosur atë përballë drejtuesve aktualë të BESËS, Bilall Kasamit dhe Adnan Azizit.

Përplasja mes palëve nuk është e re. Ajo daton që nga periudha e parazgjedhjeve, por u thellua ndjeshëm në momentin kur Bilall Kasami zhvilloi takime me strukturat e BESËS në Kërçovë pa praninë e Fatmir Limanit. Ky i fundit njihet si figurë që nuk bën kompromis, edhe në rastet kur rrezikon pozicionin politik.
Realiteti politik u bë edhe më i qartë në momentin kur Fatmir Limani u emërua ministër me vullnetin e drejtpërdrejtë të kryeministrit Mickoski, pa pëlqimin e Adnan Azizit. Edhe pse mandatin e fitoi përmes votave të VLEN-it, Limani vazhdoi ushtrimin e funksionit pa iu nënshtruar autoritetit partiak të BESËS.

Së fundmi, Limani po e demonstron hapur fuqinë e tij në qeveri përmes shkarkimeve të figurave nga Kërçova, vetëm për shkak të afërsisë së tyre me Bilall Kasamin. Bëhet fjalë për Rexhep Asanin dhe Agim Sadikun, dy emra të BESËS në Kërçovë, për të cilët pritet shkarkimi me vendim të Limanit, pa miratimin e Adnan Azizit.

Këto veprime pritet ta thellojnë edhe më shumë përçarjen mes Limanit dhe udhëheqjes së BESËS. Nëse kryeministri Mickoski i miraton këto shkarkime, ekziston rreziku real që Lëvizja BESA të lëkundet nga qeveria. Sipas vlerësimeve politike, ky skenar përkon pikërisht me interesin e Fatmir Limanit: largimin e BESËS nga pushteti ekzekutiv.

Ndërkohë, Bilall Kasami dhe Adnan Azizi po përballen edhe me tensione të brendshme, për shkak të insistimit për ndërrimin e një drejtori të BESËS, i cili konsiderohet i padëgjueshëm. Pavarësisht kërkesave të Azizit për emërimin e një figure tjetër, kryeministri Mickoski, siç duket, nuk po i merr parasysh këto propozime, duke dëshmuar se ndikimi real i BESËS në qeveri është minimal, për të mos thënë inekzistent.

Pavarësisht se kush do të dalë fitues në këtë përplasje politike, një gjë është e qartë: Lëvizja BESA po humb gradualisht peshën e saj në qeveri, deri në atë pikë sa nuk ka më kapacitet as për të menaxhuar apo shkarkuar kuadrot e veta.
Ndërkohë, në opinion po qarkullojnë edhe pritshmëri për hapjen e lëndëve ndaj Bilall Kasamit, lidhur me dyshime për keqpërdorime financiare në vlerë prej rreth 6 milionë eurosh, si dhe për ndryshime të planit urbanistik në favor të projekteve të caktuara—akuza këto që pritet të marrin trajtim institucional në periudhën në vijim.

/tvgurra