Maqedoni mbushen kapacitetet e spitaleve me të smurë nga korona !

“Me rritjen e numrit të infektuarve me Covid 19 gjatë ditëve të fundit janë stërmbushur edhe kapacitetet e spitaleve.

Këtu në Klinikën infektive në Shkup, tani më është aktivizuar edhe spitali i improvizuar në të cilin janë shtruar pesë pacientë”.

Ky spital i improvizuar u ndërtua në fillim të pandemisë.

Nuk pati nevojë të përdoret në valën e parë të të infektuarve, por pasi numri serish filloi të rritet tashmë në këtë spital janë pranuar pacientët e parë.

Aty ka kapacitet për 72 pacientë.

Zv/ministri i shëndetësisë Armend Arsllani thotë se tani për tani gjendja është nën kontroll dhe se ndihmë kanë ofruar edhe spitalet private me të cilat janë në bisedime intensive dhe po bashkëpunojnë që të ketë sa më shumë kapacitete.

“Sa i përket spitalit të Ohrit për momentin kemi 28 shtretër. Kapaciteti i tyre deri diku është i mbushur por ato janë nën menaxhim dhe koordinim të punës së tyre edhe me Spitalin e Manastirit.

Në aspekt të Klinikës Infektive këtu në Shkup për momentin kemi 95 pacient të hospitalizuar 37 prej tyre janë në përmbajtje të oksigjenit. Në spitalin 8 Shtatori kemi 121 pacientë të hospitalizuar. 26 janë me simtomatologji si dhe 95 janë me kovid pozitivë,” tha Armend Arsllani Zv Ministër i Shëndetësisë.

Sipas zëvendësministrit, spitalet po mundohen të përballojnë gjendjen e rëndë, ndërsa personeli mjekësor po punon në maksimum.

Deri më sot numri i të infektuarve aktiv në vendin tonë është 2612. Me numrin më të madh aktiv është Shkupi me 1507. Jo të gjithë të infektuarit janë të shtruar në spitale, por vetëm ata pacientë që janë në gjendje më të rëndë, ndërsa shumica e pacientëve trajtim mjekësor marrin në shtëpi.

/lajmpress