Maqedoni: Mbi 9000 persona kanë pranuar euro nga diaspora !

Drejtoria e të Ardhurave Publike deri tani ka evidentuar mbi 9000 persona që në vitin 2020 kanë realizuar të ardhura nga jashtë, të cilat me ndryshimet e reja, i nënshtrohen tatimit. Kjo informatë është pjesë e përgjigjeve që ka dhënë DAP, pas reagimeve të shumta të qytetarëve që pranuan ftesa për t’u paraqitur në institucion me qëllim rregullimin e detyrimeve tatimore për të ardhura të realizuara pesë vite më parë nga jashtë – proces që ka shkaktuar pakënaqësi të madhe. Nga DAP sqarojnë se deri tani rreth 1300 qytetarë kanë paguar tatimin, ndërsa procedura është vetëm në fazën fillestare dhe do të vazhdojë edhe për vitet e tjera pasuese, raporton gazeta KOHA.

Por, çfarë ka zbuluar DAP? “Bazuar në të dhënat e analizuara deri tani, rreth 9000 persona kanë realizuar të ardhura nga jashtë që i nënshtrohen tatimit dhe që nuk janë paraqitur. Deri tani, rreth 1300 persona janë vetëdëklaruar duke paraqitur të ardhura në vlerë prej rreth 19 milionë denarësh dhe kanë paguar tatim në vlerë prej rreth 10 milionë denarësh. Për 307 persona, DAP ka përcaktuar zyrtarisht detyrimin tatimor në vlerë prej 1.5 milion denarësh, i cili është paguar”, thonë në DAP.

Gazeta KOHA ka raportuar ditë më parë për këtë temë, pasi shumë qytetarë janë ankuar në momentin kur është iniciuar procedura. Askush nuk kundërshton ligjshmërinë e procesit, por të shumtë janë ata që theksojnë se pas pesë vitesh, është vështirë të gjenden dokumente që vërtetojnë se tatimi është paguar në vendin nga ka ardhur e ardhura.

Sepse, shumë qytetarë nuk e dinë nëse tatohen dërgesat familjare nga jashtë, nëse tatohen paratë për ushqim e shpenzime, dhuratat, pagesat nga të afërmit… DAP thotë se detyrimi për deklarimin e të ardhurave nga jashtë nuk është rregullore e re, por ka ekzistuar edhe më parë – si në Ligjin e tatimit personal, ashtu edhe në Ligjin aktual për tatimin e të ardhurave personale. Sipas DAP-it, njoftimet që pranojnë qytetarët nuk nënkuptojnë automatikisht detyrim tatimor, por janë ftesa të personalizuara për të sqaruar burimin e të ardhurave dhe për të dorëzuar dokumentacion. DAP madje thotë se ofron mbështetje individuale për çdo rast. “Por, nëse qytetari nuk vetëdeklarohet, DAP ka të drejtë të përcaktojë tatimin zyrtarisht”, janë decid nga DAP-i, ndërsa sqarojnë se nuk tatohen paratë e dërguara nga familjarët e ngushtë (prindër, fëmijë, vëllezër, motra) për nevoja personale, dhuratat, paketat festive, dërgesat për shpenzime mujore, shëndetësi, studime dhe ushqim.

Por, DAP shton se këto duhet të jenë “të dokumentuara si duhet”, por nuk sqaron se çfarë dokumentacioni kërkohet saktësisht. “Tatohen vetëm të ardhurat nga pune, honorarët, shërbimet, të drejtat autoriale, si dhe çdo veprimtari e pavarur që sjell të ardhura”. Me këtë rast, DAP këshillon qytetarët të dorëzojnë llogaritjen elektronike në sistemin e-Deklarime të DAP-it, të ngarkojnë dokumentet që tregojnë llojin e të ardhurave, si dhe të ngarkojnë dëshmi për tatim të paguar jashtë vendit (nëse ka). “Pas dorëzimit, një nëpunës i DAP-it e shqyrton rastin dhe nëse gjithçka është në rregull, gjeneron deklaratën dhe urdhërpagesën”.

/(koha.mk)