Migros: Punëtorët e larguar nga puna mbeten pa dhurata !

Punonjësit e Migros që janë larguar nga puna ose kanë dhënë dorëheqjen para fundit të tetorit nuk do të përfitojnë dhuratën e Krishtlindjeve, edhe pse kompania po shënon 100-vjetorin e saj. Dhurata, një kupon deri në 300 franga zvicerane, u jepet vetëm punonjësve aktivë, ndërsa të larguarit para 31 tetorit përjashtohen, edhe nëse janë ende në periudhë njoftimi.

Ky vendim ka shkaktuar pakënaqësi mes ish-punëtorëve. Një punonjës afatgjatë ka deklaruar për 20 Minuten se përjashtimi tregon mungesë vlerësimi, sidomos për ata që janë larguar për shkak të shkurtimeve të stafit.

Vendimi është kritikuar edhe nga ekspertë të burimeve njerëzore, të cilët theksojnë se përjashtimi i ish-punonjësve dëmton moralin dhe ndikon negativisht edhe te stafi aktual.

Nga ana e saj, Migros justifikohet duke thënë se vendosja e një date përfundimtare është e nevojshme për arsye administrative dhe se kjo praktikë është standarde. Kompania nuk ka bërë të ditur sa punonjës mbeten pa dhuratë këtë vit.

Vendimi vjen në një kohë kur Migros po përballet me shitje filialesh dhe shkurtime të stafit, duke rritur pasigurinë mes punonjësve.

/albinfo