Ekstradohet nga Zvicra në Kosovë i kërkuari me urdhërarrest ndërkombëtar!

Një person i dyshuar, i kërkuar me urdhërarrest ndërkombëtar të lëshuar nga institucionet e drejtësisë së Kosovës për veprën penale “Kanosje”, është ekstraduar nga Zvicra në Kosovë, transmeton albinfo.ch.

Ekstradimi është realizuar falë bashkëpunimit të ngushtë ndërmjet institucioneve të Republikës së Kosovës dhe autoriteteve zvicerane. Pas mbërritjes në Kosovë, i dyshuari u është dorëzuar njësive përkatëse të Policisë së Kosovës në rajonin e Prizrenit për vazhdimin e procedurave të mëtejme ligjore.

Policia e Kosovës ka njoftuar se ekstradimi është kryer më 17 dhjetor 2025 nga Drejtoria për Bashkëpunim Ndërkombëtar Policor, në koordinim me njësitë relevante të Policisë së Kosovës dhe institucionet e drejtësisë.

“Policia e Kosovës do të vazhdojë shkëmbimin e informacioneve me institucionet vendore, shtetet partnere dhe organizatat ndërkombëtare me qëllim të parandalimit, hetimit dhe zbulimit të aktiviteteve kriminale, si dhe gjurmimin, kapjen dhe arrestimin e personave dhe grupeve kriminale që veprojnë brenda dhe jashtë vendit”, thuhet në njoftimin zyrtar të Policisë.

/albinfo