Ali Ahmeti përgatiti një “fshesë” për “shtatë personalitete të konsumuara!

“Pritet që 20 dhjetori të jetë një datë vendimtare për BDI-në. Ose dritë jeshile për rilindje dhe reformë të thellë, ose dritë e kuqe, që do të konfirmojë vazhdimin e rënies politike. Pas humbjes së rëndë në zgjedhjet lokale, BDI gjendet përballë një testi historik, ku ndryshimet rrënjësore në strukturën e ngushtë drejtuese paraqiten si kushti kryesor për mbijetesë dhe rikthim të fuqishëm.” – thekson “Tetova Sot” në informacionin e saj me titullin “BDI para një testi historik: 7 emrat e parë të personaliteteve nga kryesia që Ali Ahmeti do t’i largojë më 20 dhjetor?”.

Duke u thirrur në burimet e veta të informacionit, portali shkruan më tej: Edhe pse Ali Ahmeti do të vazhdojë ta udhëheqë partinë që doli nga lufta, portali Tetova Sot mëson se ai, si lider i BDI-së, ka kuptuar se një reformë e vërtetë është e pamundur pa largimin e personaliteteve të konsumuara dhe të komprometuara në sytë e opinionit publik. Pikërisht këto personalitete, me jetëgjatësinë e tyre politike dhe veprimet e përsëritura, i kanë shkaktuar dëm serioz imazhit të partisë në publik. Kjo listë nuk është përfundimtare.

Më 20 dhjetor pritet një valë e gjerë shkarkimesh dhe riorganizimesh, ku shumë personalitete të tjera do të zëvendësohen me kuadro të reja, politikisht të pakonsumuar dhe me besueshmëri publike. Pritet që Ali Ahmeti të ndërhyjë në degët e partisë, ku do të bëhen ndryshime në udhëheqje. Pritet që disa nga kryetarët aktualë të degëve të zëvendësohen me personalitete të reja, me qëllim që BDI të rikthehet si forcë dominuese në zgjedhjet e ardhshme dhe si parti që do të rrezatojë shpresë, energji të re dhe besueshmëri politike. – publikoi “Tetova Sot”.

/ts