Avokati i Popullit pa kryesues, reagon zëvendësi Ylber Rufati

Në Maqedoninë e Veriut institucioni i Avokatit të Popullit funksionon pa kryesues, por vetëm me zëvendës, duke ngritur shqetësime serioze për mbrojtjen e të drejtave të qytetarëve dhe besimin publik. Në një intervistë për Portalb.mk, zëvendës Avokati i Popullit, Ylber Rufati, sqaroi se institucioni vazhdon të ushtrojë kompetencat e tij kushtetuese dhe ligjore pa ndërprerje, duke u mbështetur në profesionalizmin e stafit dhe në koordinimin e brendshëm. Megjithatë, ai pranon se mungesa e kryesuesit ndikon në peshën e përfaqësimit institucional dhe në adresimin publik të çështjeve madhore, duke theksuar nevojën që Kuvendi të përmbyllë sa më shpejt procedurën ligjore për zgjedhjen e Avokatit të Popullit.

Si e vlerësoni aktualisht funksionimin e institucionit të Avokatit të Popullit? A mendoni se me zëvendës dhe pa kryesues, institucioni ka mundësi të sigurojë mbrojtje efektive të të drejtave të qytetarëve?
Ylber Rufati: Institucioni i Avokatit të Popullit, edhe në kushte të mungesës së kryesuesit, vazhdon të funksionojë në përputhje me kompetencat ligjore dhe detyrimet kushtetuese. Falë përkushtimit të stafit profesional dhe zëvendësve, mbrojtja e të drejtave të qytetarëve nuk është ndërprerë. Megjithatë, mungesa e Avokatit të Popullit ndikon në aspektin e përfaqësimit të plotë institucional dhe në fuqinë e adresimit publik të çështjeve madhore.

Çfarë masa konkrete keni ndërmarrë që institucioni të mos bllokohet në mungesë të kryesuesit dhe si ndikojnë ato në përpunimin e parashtresave dhe përfaqësimin e qytetarëve?
Ylber Rufati: Janë ndërmarrë masa organizative dhe operative për të siguruar vazhdimësinë e punës, duke rishpërndarë kompetencat brenda kuadrit ligjor, duke forcuar koordinimin ndërmjet sektorëve dhe duke prioritizuar rastet urgjente. Parashtresat trajtohen në mënyrë të rregullt, pa ndërprerje, ndërsa përfaqësimi i qytetarëve vazhdon në kuadër të autorizimeve ligjore ekzistuese.

A ka mungesë të kapaciteteve profesionale ose të stafit për shkak të vakancës së kryesuesit?
Ylber Rufati: Nuk ka mungesë formale të kapaciteteve profesionale si pasojë direkte e vakancës së kryesuesit. Stafi është funksional dhe profesionalisht i përgatitur. Megjithatë, mungesa e drejtuesit ndikon në aspektin strategjik, në vendimmarrjet që kërkojnë autoritet institucional të plotë dhe në përfaqësimin ndërkombëtar të institucionit.

A është duke u respektuar procedura ligjore për zgjedhjen e kryesuesit në përputhje me Ligjin për Avokatin e Popullit dhe kur pritet konkretisht një zgjedhje përfundimtare?
Ylber Rufati: Procedura për zgjedhjen e Avokatit të Popullit është kompetencë e Kuvendit dhe duhet të zhvillohet në përputhje të plotë me Ligjin për Avokatin e Popullit. Institucioni ynë nuk ka kompetenca për ta përcaktuar dinamikën e kësaj procedure. Presim që organet përgjegjëse shtetërore ta përmbyllin këtë proces sa më shpejt, në interes të stabilitetit institucional dhe të besimit të qytetarëve.

A mendoni se mungesa e Avokatit të Popullit dhe periudha tranzitore mund të minojnë besimin e qytetarëve në institucion?
Ylber Rufati: Periudhat e gjata tranzitore gjithmonë mbartin rrezik për perceptimin publik dhe besimin e qytetarëve. Megjithatë, përmes transparencës, profesionalizmit dhe trajtimit të barabartë të të gjitha parashtresave, po angazhohemi që besimi i qytetarëve të ruhet dhe të mos cenohet nga kjo situatë e përkohshme.

Në situata kur parashtresat lidhen me tema të ndjeshme, si të drejtat e fëmijëve, minoriteteve apo abuzimet sociale, a ka rrezik që shqyrtimet të vonohen apo të mos merren seriozisht për shkak të vakancës aktuale?
Ylber Rufati: Rastet që lidhen me kategori të ndjeshme trajtohen me prioritet të lartë, pavarësisht vakancës së kryesuesit. Nuk ka kompromis në seriozitetin e trajtimit të këtyre çështjeve. Çdo vonesë eventuale është më shumë pasojë e procedurave administrative në institucionet e tjera dhe jo e vakancës në institucionin tonë.

A keni ndonjë rast konkret të rëndë që është vonuar ose rrezikuar për shkak të mungesës së kryesuesit, dhe nëse po, kush do të mbajë përgjegjësi për këtë dëmtim të të drejtave të qytetarëve?
Ylber Rufati: Deri më tani, nuk ka raste konkrete të dokumentuara ku të konstatohet se një e drejtë është cenuar drejtpërdrejt për shkak të mungesës së Avokatit të Popullit. Institucioni vazhdon të funksionojë në përputhje me ligjin dhe çdo rast trajtohet sipas afateve të parashikuara. Përgjegjësia institucionale, nëse do të konstatohej një pasojë e tillë, do të duhej të vlerësohej në përputhje me mekanizmat ligjorë përkatës.

/portalb