Garë e fortë në Gostivar për kryetar komune! Si mendoni kush do të fitoj Limani ose Bejta ?

Zgjedhjet e përsëritura në Gostivar pritet të sjellin një garë e jashtëzakonshme në këtë komune. Valbon Limani i ASH-së së Taravarit, kandidon në kuadër të AKI-së, ku bën pjesë edhe BDI-ja, ndërsa do të përballet me ish-kryetarin e komunës Nevzat Bejta, i cili për 20 vite ka qenë figura kryesore e BDI-së në Gostivar, ndërsa tash përkrahet nga VLEN-i.

“Sot dorëzuam kandidaturën time për kryetar të komunës së Gostivarit në kuadër të koalicionit Aleanca Kombëtare për Integrim. Mesazhi ynë është urojmë të ketë zgjedhje fer dhe demokratike dhe urojmë që këtë radhë të ketë radhë të kemi një kryetra të përzgjedhur. Presim fitore gjithsesi, do shohim me çfarë rezultati varësisht nga jehona apo dalja e votuesve, ne presim rezultat më të mirë dhe të gjithë së bashku kështu kompakt do të dalim dhe festojmë fitoren”, deklaroi Valbon Limani – kandidat për kryetar të Gostivarit.

Nevzat Bejta gjatë dorëzimit të kandidaturës u prit nga ish-drejtorët dhe ministri i shëndetësisë.
Duke falënderuar krerët e VLEN-it tha se qëllimi është që të punojnë për qytetin, i cili sipas tij, për tetë vite është shkatërruar.

“Jam shumë mirënjohës nga gjithë qytetarët e qytetit të Gostivarit pa dallim partinë që i takojnë apo nacionalitetin, që na japin mbështetjen për të mirën e qytetit të Gostivarit. Po ashtu një falënderim të madh liderëve të VLEN për mbështetjen që ma japin për të mirën e qytetit sepse për tetë vitet e shkuara qyteti është shkatërruar dhe me këtë mbështetje që më japin liderët e VLEN do të ndërpresim shkatërrimin e qytetit të Gostivarit, shkaku se qytetarët e duan qytetin e vetë dhe ne do bashkohemi për ta ndërtuar bashkë qytetin tonë dhe do jemi të bashkuar deri në fitoren e madhe të 11 janarit”, u shpreh Nevzat Bejta – kandidat për kryetar të Gostivarit.

Aleanca për Shqiptarët, krahu i Ziadin Selës, që së fundmi u largua nga AKI-ja, me shumë gjasa nuk do të ketë kandidat në Gostivar, por po në Vrapçisht.
Ziadin Sela: Sipas të gjithë gjasave në njërën nga këta komuna ne do kandidojmë me kandidat tonin, gjasat më të mëdha janë që të garohet në komunën e Vrapçishtit.

TV21: Keni emrin e kandidatit?
Ziadin Sela: Do informoheni deri nesër janë afatet. Në Gostivar do përfundojnë kandidaturat dhe më pas do shohim dhe pastaj do të ketë qëndrim.

TV21 mëson se Zulhajrat Demiri-Zuli do të jetë kandidat i pavarur për kryetar të komunës së Vrapçishtit, por që do të ketë mbështetjen e ASH-së së Selës. Ai aktualisht është kryetar i Degës së ASH-Sela në Vrapçisht, ndërsa më herët ka qenë drejtor i Ndërmarrjes “Hekurudha – Transport”.

/tv21