Nevzat Bejta, njeriu i BDI-së, kandidat i VLEN-it për Gostivarin?

Në prag të zgjedhjeve të jashtëzakonshme në Gostivar, ish-kryetari i komunës së Gostivarit, Nezat Bejta, një nga figurat e njohura të BDI-së, do të kandidojë nën siglën e VLEN-it për kryetar të Gostivarit, siç ka kuptuar Albanian Post.

Nevzat Bejta ka një karrierë të gjatë politike. Ai ka shërbyer si këshilltar komunal në vitin 1999, deputet në Parlamentin e Maqedonisë nga 2002 deri më 2005, si dhe kryetar i komunës së Gostivarit gjatë dy mandateve, 2005–2009 dhe 2013–2017.

Nga 2011 deri më 2013, Bejta mbajti postin e ministrit të Vetëqeverisjes Lokale, duke pasur përgjegjësi për koordinimin e autoriteteve lokale dhe zhvillimin e politikave komunale.
Përveç Bejtës, për kryetar të Gostivarit garon edhe Valbon Limani nga Aleanca Kombëtare për Integrim (AKI).

Zgjedhjet e përsëritura për kryetarët e komunave të Gostivarit, Vrapçishtit, Mavrovës dhe Rostushës, si dhe të Qendrës Zhupë, do të mbahen më 11 janar të 2026-së. Ky vendim është marrë nga Kryetari i Kuvendit të Maqedonisë së Veriut, Afrim Gashi, më 17 nëntor.

Gashi u ka bërë thirrje Komisionit Shtetëror të Zgjedhjeve, komisioneve komunale dhe organizatave mbikëqyrëse që të veprojnë me përpikëri, transparencë dhe profesionalizëm.

Raundi i parë i zgjedhjeve lokale në Maqedoninë e Veriut u mbajt më 19 tetor, ndërsa raundi i dytë më 2 nëntor. Në këto katër komuna nuk u arrit pragu i daljes në raundin e parë dhe, sipas Kodit Zgjedhor, nisi procedura e re zgjedhore.

/albanianpost