S’ka marrëveshje për datën e zgjedhjeve

Zgjedhjet janë të nevojshme urgjentisht, tha kreu i LSDM-së, Zoran Zaev. Sipas tij, 5 korriku si datë për zgjedhje nuk është përzgjedhja e tij personale dhe nuk është çështje inati. Ai është gati për një lëshim të fundit, që zgjedhjet të mbahen më 8 korrik. Sipas Zaevit, kjo datë është e pranueshme edhe për liderin e VMRO – DPMNE-së, Hristijan Mickoski. Sot, Zaev nga Strumica tha se ky është lëshimi i fundit që e bën dhe pret që VMRO-DPMNE ta pranojë sfidën.

… Gjendja e jashtëzakonshme përfundon sonte në mesnatë, nëse pranohet 8 korrik, unë do t’i kërkoj kryeministrit Spasovski dhe ministrave që të mblidhen sot vonë, për të thirrur një seancë qeveritare për të paraqitur një propozim për zgjatjen e gjendjes së jashtëzakonshme për 3 ditë. Këtë herë për shkak të një marrëveshje me opozitën”-theksoi Zoran Zaev, kryetar i LSDM-së.

Opozita përsëriti sot qëndrimin e saj se shëndeti i qytetarëve në kushtet e një pandemie është parësore. Ata theksuan se nuk mund të ketë zgjedhje pa një listë të pastruar zgjedhore dhe pa misionin e vëzhgimit të OSBE-së. Pa një monitorim ndërkombëtar, VMRO-DPMNE ka frikë nga vjedhjet zgjedhore.

VMRO-DPMNE është për konsensus, por jo edhe për diktate të Zoran Zaevit. Zgjidhja për të mirën e shtetit dhe popullit është ajo që i duhet në momentin Republikës së Maqedonisë. Qëllimi ynë është të arrijmë mjedisin më të sigurt të mundshëm për zgjedhje në rrethana të tilla komplekse”-pohoi Orce Gjeorgjievski, VMRO – DPMNE.

BDI mbetet në qëndrimin se data e zgjedhjeve duhet të vendoset me consensus.

Mbrëmë, liderët e LSDM-së dhe VMRO-DPMNE-së nuk arritën të bien dakord për një datë për zgjedhjet edhe pse Presidenti Stevo Pendarovski njoftoi se nuk do ta zgjasë gjendjen e jashtëzakonshme, që do të nënkuptonte shtyrjen e zgjedhjeve, e cila sipas dekretit të Qeverisë duhet të mbahet për 22 ditë nga përfundimi i gjendjes së jashtëzakonshme.

/Alsat