Samiti në Tiranë “Rruga jonë drejt BE-së”

Maqedonia ishte vendi i parë në rajon që operacionalizoi Instrumentin për Reforma dhe Rritje dhe i pari që mori parapagim sipas Planit, theksoi kryeministri Hristijan Mickoski në fjalimin e tij në samit. “Mesazhi ynë është se Maqedonia i përmbush kriteret, dhe tani presim një qasje të drejtë dhe meritore nga partnerët tanë”, shtoi ai.

“Nuk shoh më asnjë kuptim nëse problemet dypalëshe dhe mosmarrëveshjet bilaterale janë ato që vendosin nëse vendet duhet të bëhen anëtare të plota të BE-së. Për mua, thelbi është realizimi, reformat, hapat që ndërmerren. Dhe për sa kohë gjithçka bazohet në sistemin e realizimit, atëherë ne si shtet do të jemi konkurrues dhe jam i bindur se do të jemi të parët që do të arrijmë qëllimin final”, tha Hristijan Mickoski – Kryeministër.

Në fjalimin e tij, kryeministri i Shqipërisë, Edi Rama, theksoi se rajoni aktualisht ndodhet në periudhën e reformave më të thella deri më tani – transformime për të krijuar një model evropian të qeverisjes brenda çdo vendi.

“Ballkani Perëndimor është zgjedhur të ecë përpara së bashku me Planin për Rritje, i cili na shërben si hartë e përbashkët rruge. Rrugë jo vetëm drejt Brukselit, por drejt lirisë dhe mundësive të tregut unik evropian, të cilit historikisht, gjeografikisht dhe në fat i përkasim”, shtoi Edi Rama – Kryeministër i Shqipërisë.
“Evropa ju pret, ju tashmë jeni pjesë e saj, por duhet të bëheni pjesë e BE-së në mënyrë institucionale”, përsëriti eurokomisarja Marta Kos.

“Shqipëria, Mali i Zi dhe Maqedonia tashmë kanë përfitime nga ulja e kostove të transaksioneve përmes SEPA-s. Diskutuam dje që kursimet në Maqedoninë e Veriut arrijnë në 62 milionë euro në vit. Por ambicia jonë është që të gjithë ju të ecni përpara – nuk duam askush të mbetet prapa. Sepse i gjithë Ballkani Perëndimor i përket Bashkimit Evropian si anëtarë të barabartë dhe, theksoj, me të drejta të plota”, pohoi Marta Kos – Presidente e Komisionit Evropian. Edhe kryeministrat e Malit të Zi, Kosovës dhe Bosnjë e Hercegovinës mbajtën fjalimet në samit.

/tv21