Koncerti “Për hir të doajenëve tanë”

Kushtuar: Vëllezërve Dervishi, Vëllezërve Sejdiu dhe Haxhi Maqellarës
Sonte, më 30 tetor, në Teatrin Shqiptar të Shkupit, me fillim nga ora 19:30, Ansambli Shtetëror i Këngëve dhe Valleve Popullore Shqiptare në RMV organizon koncertin e veçantë “Për hir të doajenëve tanë”, kushtuar Vëllezërve Dervishi, Vëllezërve Sejdiu dhe Haxhi Maqellarës — një mbrëmje nderimi për ikonat që lanë gjurmë të pashlyeshme në kulturën shqiptare.

Ky koncert është më shumë se një ngjarje artistike — është një përkulje e thellë para brezave që i dhanë shpirt, dinjitet dhe identitet muzikës popullore shqiptare. Është një kujtesë se arti i tyre ka tejkaluar kohën, duke mbetur trashëgimi e gjallë për brezat që vijnë.

Në këtë mbrëmje do të interpretohen disa nga krijimet më të njohura të këtyre mjeshtërve të paharruar, të cilat janë bërë pjesë e kujtesës kolektive si pasuri e çmuar kulturore.

Drejtori i Ansamblit, Jetmir Rexhepi, njoftoi se publiku do të përjetojë një udhëtim emocional nëpër tingujt e dashurisë, nostalgjisë dhe krenarisë shqiptare, përmes interpretimit të artistëve të Ansamblit, të cilët me përkushtim dhe profesionalizëm do të risjellin magjinë e artit të vërtetë.

/tvgurra