Bilall Kasami: BDI e nxori Fatmir Deharin vetëm për ta humbur Kërçovën !

Kryetari i Komunës së Tetovës dhe njëri nga liderët e VLEN-it, Bilall Kasami, ka sulmuar ashpër kandidatin e BDI-së për Komunën e Kërçovës, Fatmir Deharin, duke e cilësuar atë si “kandidatin më të dobët” që kjo parti ka nxjerrë ndonjëherë.

Gjatë një interviste në Alsat, Kasami tha se qëndrimet e tij morale janë të njohura për publikun dhe se nuk mund të pritet prej tij që të përkrahë një kandidat si Dehari.

“Fatmir Dehari është kandidati më i dobët i BDI-së. Ai nuk i solli asnjë të mirë Kërçovës, por vetëm degjenerim. BDI-ja, që në momentin kur e ka nxjerrë Fatmir Deharin, e ka nxjerrë për ta humbur Kërçovën”, theksoi Kasami.

Sipas tij, publikimi i përgjimeve dhe videoincizimeve që dolën për Deharin janë dëshmi e gjendjes morale që ai i ka sjellë qytetit.
“Duke e marrë parasysh se çfarë doli në opinion në aspekt të moralit – apo më saktë mungesës së moralit të tij – nuk mund ta përkrahim vetëm pse është shqiptar. Nuk mund të qëndrojmë pas një kandidati që e dëmtoi Kërçovën”, shtoi Kasami.

Kasami përfundoi duke thënë se qytetarët e Kërçovës meritojnë dinjitet, zhvillim dhe përfaqësim të pastër moral, jo politikanë që shërbejnë si barrë për imazhin e shqiptarëve.

/ms