Tv Gurra: Tubim elektoral i AKI-së në Kërçovë

Në sheshin qendror të Kërçovës u mbajt një tubim i Aleancës për Integrim Kombëtar (AKI), ku morën pjesë qindra qytetarë dhe përfaqësues të lartë të partisë.

Në mesin e të pranishmëve ishin figura të njohura politike si Ziadin Sela, Kreshnik Bekteshi, shefi i shtabit zgjedhor Faton Ahmeti, Argjent Asani shef i shtabit komunal,bartësi i listës Ilir Rushani, kryetari i Komunës së Kërçovës Fatmir Dehari, si dhe kryetari i partisë Ali Ahmeti.

Në fjalimet e tyre, folësit theksuan rëndësinë e unitetit politik dhe shoqëror, duke theksuar se të gjitha etnitetet që jetojnë në Kërçovë janë të barabarta dhe duhet të vazhdojnë të ndërtojnë bashkë një të ardhme më të mirë. Ata nënvizuan se qyteti ka qenë gjithmonë shembull i bashkëjetesës dhe mirëkuptimit ndëretnik.

Gjithashtu, u përmend edhe gjendja e rëndë e vitit 2013, duke e kujtuar si periudhë të vështirë për qytetin, por që sot Kërçova është shndërruar në një shembull të zhvillimit dhe përparimit. Në këtë drejtim, u theksuan punimet dhe projektet që janë realizuar gjatë viteve të fundit, të cilat kanë përmirësuar ndjeshëm infrastrukturën dhe jetën e përditshme të qytetarëve.

Në fjalën e tij, kryetari Ali Ahmeti theksoi se “Kërçova është zemra e bashkimit dhe forca e qëndresës sonë”, duke shtuar se përmes punës, bashkëpunimit dhe respektit të ndërsjellë mund të ndërtohet një shoqëri më e drejtë dhe më e zhvilluar.

Tubimi u mbyll në atmosferë entuziazmi, me duartrokitje dhe mbështetje të madhe nga qytetarët, të cilët u shprehën të vendosur për të vazhduar rrugën e zhvillimit dhe të bashkimit.

/tvgurra