Izraeli kapi shumicën e anijeve të Flotës Globale Sumud, vetëm një është afër bregut të Gazës!

Që nga 1 tetori 2025, forcat izraelite kanë ndaluar 223 aktivistë ndërkombëtarë në bordin e Flotiljes Sumud, një konvoj humanitar që synonte të sfidonte bllokadën izraelite të Gazës, raporton TRT. Pavarësisht ndërhyrjeve dhe më shumë se 20 përgjimeve të paligjshme gjatë operacionit, anija “Mikeno” ka arritur të depërtojë dhe ka mbërritur në ujërat palestineze.

Sipas ueb-faqes së Flotiljes Global Sumud, deri tani 20 anije janë kapur, 19 dyshohet të jenë kapur, ndërsa vetëm katër lundrojnë ende, ndërsa vetëm anija “Mikeno” ka arritur të depërtojë më afër Gazës, transmeton Portalb.mk.

“Forcat detare izraelite përgjuan dhe hipën në mënyrë të paligjshme në anijen All In të Flotiljes Global Sumud së bashku me anije të tjera në ujërat ndërkombëtare.
Transmetimet e drejtpërdrejta dhe komunikimet janë ndërprerë.

Statusi i pjesëmarrësve dhe i ekuipazhit mbetet i pakonfirmuar. Ky është një sulm i paligjshëm ndaj aktivistëve humanitarë të paarmatosur. U bëjmë thirrje qeverive dhe institucioneve ndërkombëtare të kërkojnë sigurinë dhe lirimin e tyre të menjëhershëm”, thuhet në Facebookun e Flotiljes Globale Sumud (GSF).

Ministria e Jashtme e Izraelit tha se disa anije që janë pjesë e Flotiljes Globale Sumud (GSF) ishin “ndaluar në mënyrë të sigurt” dhe se ata që ishin në bord po transferoheshin në një port izraelit. Ajo shtoi se marina u kishte thënë anijeve të ndryshonin kursin ndërsa po “i afroheshin një zone aktive luftimi”.

Çfarë ndodhi me flotiljen të mërkurën?
Izraeli ndaloi një flotilje me anije që transportonin ndihma humanitare, sipas deklaratave të organizatorëve të flotiljes.

Ata raportuan se forcat detare izraelite hipën në anije rreth 70 milje detare (130 km) larg bregdetit të Gazës, duke prerë komunikimet dhe duke bllokuar sinjalet ndërsa flotilja iu afrua enklavës së bllokuar.

Në total, të paktën 13 anije që janë pjesë e flotiljes janë ndaluar në det.
Saif Abukeshek, zëdhënës i Flotiljes Globale Sumud, tha se më shumë se 201 persona nga 37 vende ishin në bordin e këtyre anijeve. Kjo përfshin ndër të tjerë, 30 pjesëmarrës nga Spanja, 22 nga Italia, 21 nga Turqia dhe 12 nga Malajzia.

“Ne kemi rreth 30 anije që ende po luftojnë për t’u larguar nga anijet ushtarake të forcave pushtuese që përpiqen të arrijnë në brigjet e Gazës. Ata janë të vendosur”, shtoi ai.

Sipas organizatorëve të flotiljes, ato tani janë 85 km (46 milje detare) nga bregu i Gazës.
Progresi i flotiljes përgjatë Mesdheut kishte tërhequr tashmë vëmendjen ndërkombëtare dhe arrestimet e aktivistëve në bord shkaktuan protesta në qytete duke përfshirë Romën, Buenos Airesin dhe Stambollin të mërkurën në mbrëmje.

Më herët gjatë ditës, aktivistët përshkruan takime të errëta me anije të pa ndriçuara dhe dronë që ndiqnin konvojin, duke rritur tensionet në bord.
“Të mërkurën … rreth orës 20:30 të mbrëmjes [17:30 GMT], anije të shumta të Flotiljes Global Sumud – veçanërisht Alma, Surius, Adara – u kapën dhe u hipën në bord në mënyrë të paligjshme nga Forcat Pushtuese Izraelite në ujërat ndërkombëtare”, thuhej në një deklaratë të flotiljes.

“Para se të hipnin në anije në mënyrë të paligjshme, duket sikur anijet detare izraelite dëmtuan qëllimisht komunikimet e anijeve, në një përpjekje për të bllokuar sinjalet dhe për të ndaluar transmetimin e drejtpërdrejtë të hipjes së tyre të paligjshme në anije.”

Pavarësisht se mbante vetëm një sasi simbolike ndihme humanitare, flotilja kishte vazhduar me misionin e saj për të krijuar një korridor detar në Gaza, ku gati dy vjet luftë e Izraelit e kanë lënë popullsinë përballë një krize akute humanitare.

Kërkohet lirimi i aktivistëve
Në një video të publikuar në Facebook, aktivistja suedeze, Greta Thunberg, deklaron se është rrëmbyer dhe mbajtur peng kundër vullnetit të saj nga forcat izraelite. Ajo thekson se misioni i saj humanitar ishte i pa-dhunshëm dhe i mbrojtur nga ligji ndërkombëtar, duke kërkuar që qeveria suedeze të ndërmarrë veprime për lirimin e saj të menjëhershëm dhe të të tjerëve,

Thunberg ishte pjesë e flotës Global Sumud Flotilla, një konvoj ndërkombëtar që synonte të dërgonte ndihma humanitare në Gaza dhe të sfidonte bllokadën detare të Izraelit. Në një mesazh të regjistruar paraprakisht, ajo thotë:

“Unë quhem Greta Thunberg. Jam shtetase e Suedisë. Nëse po e shihni këtë video, unë jam rrëmbyer dhe jam marrë peng kundër vullnetit tim nga forcat izraelite. Misioni ynë humanitar ishte i pa-dhunshëm dhe i përmbahet ligjit ndërkombëtar. Ju lutem tregoni Qeverisë së vendit tim të kërkojë lirimin e menjëhershëm timin dhe të të tjerëve”.
Ky mesazh siç edhe mund të kuptohet, ishte përgatitur në rast se anija e saj do të pengohej për para mbërritjes në Gaza.

/portalb