Ali Ahmeti i quajti shqiptarët Zagarë ! Reagon Rexhep Asani

Rexhep Asani ka reaguar ashpër pas fjalimit të kryetarit të BDI-së, Ali Ahmeti, në konventën e djeshme të AKI-së. Ai u shpreh i indinjuar nga përdorimi i termit “zagarë” për një pjesë të shqiptarëve, duke theksuar se një fjalor i tillë është i ulët, përçarës dhe politikisht i rrezikshëm.

“Unë nuk jam zagar i askujt, por qytetar që dëshiron të kontribuojë për të përmirësuar jetën e njerëzve,” tha Asani, duke shtuar se shqiptarët duhet të votojnë me arsye të kthjellët dhe t’i japin fund 23 viteve të zallamahisë së BDI-së.

Ai shkruan ne Fb
Të dashur qytetarë, të dashur votues,
Ndjeva obligim moral dhe intelektual të sqaroj opinionin publik mbi disa sekuenca të dala nga lideri i opozitës shqiptare në Maqedoni. Jam thellësisht i indinjuar nga ai fjalor, sidomos nga fakti se edhe unë jam nga i njëjti vendbanim dhe dua të mos mbetet përshtypja se të gjithë ne bashkëvendasit ndajmë të njëjtat vlera politike e intelektuale.

Jam i habitur dhe i zhgënjyer tejmase me deklaratat, ku gjysma apo më tepër e shqiptarëve quhen “zagarë” nga goja e njeriut që pretendon të jetë “çlirimtari” i tyre dhe lideri “suprem” e “legjitim”! Ndaj e dënoj me forcë atë deklaratë.

Ka disa arsye që po shkruaj për këtë. Së pari, është shumë e ulët të përdorësh një zhargon të tillë. Së dyti, është politikisht e paqëndrueshme. Nuk do ta analizoj nga aspekti psikoanalitik, por vetëm nga ai politik dhe njerëzor. Nëse ky person pretendon të jetë përbashkuesi i shqiptarëve, një fjalor i tillë sjell vetëm përçarje.

Edhe në rastin hipotetik, sikur kandidati i tyre të dilte përpara në raundin e parë (gjë që nuk ka për të ndodhur), me çfarë morali do t’i lutej “zagarëve” që, në emër të patriotizmit të maskuar, t’i jepnin mbështetje politike? Cili i ashtuquajtur “zagar” do t’ia çonte votën?

Deklarata të tilla janë vërtet shqetësuese dhe politikisht të rrezikshme. Kjo është për keqardhje. Ju lutem të gjithë njerëzve me arsye të shëndoshë të analizojnë me gjakftohtësi dhe të votojnë me mendje të kthjellët, që t’i japim fund kësaj zallamahie 23-vjeçare që na krijoi BDI-ja me personazhe të tillë kontraversë.
Ndjesë për ashpërsinë e tekstit, por jam thellësisht i indinjuar si njeri nga Kërçova.

Fatmir Beqir Limani dhe VLEN janë fituesit e radhës në Kërçovë, sepse Kërçova meriton ndryshim, sepse Kërçova meriton më mirë.
Unë nuk jam zagar i askujt, jam njeri që dëshiron të kontribuojë për të përmirësuar kushtet e jetesës për qytetarët e këtij vendi.

/tvgurra