Fshatrat e Gostivarit izolohen nga Policia !?

Banorët e fshatrave Zdunjë, Raven, Mirditë, Vërtok dhe Reçan po mbahen të izoluar nën një regjim të shtetit policor, të udhëhequr nga ministri i Punëve të Brendshme, Toshkovski.

Kështu akuzon kryetari i Degës së BDI-së në Gostivarz Valdet Xhaferi, ndërsa thotë se prej disa ditësh me radhë, në kulmin e sezonit veror dhe në fluksin e mërgimtarëve, banorëve të kësaj ane të Gostivarit u është kufizuar liria e lëvizjes.

“Ata detyrohen të shfrytëzojnë rrugë alternative disa kilometra më tepër se sa ajo që është normale, për shkak të ndalimit të kalimit në udhëkryqin e Zdunjës, në hyrje të qytetit.

E gjithë kjo ndodh pas një vendimi të Ministrisë së Punëve të Brendshme, që u jep përparësi udhëtarëve drejt Ohrit! Që fatkeqësia të jetë edhe më e madhe, sot janë arrestuar disa banorë të fshatit Zdunjë vetëm pse kanë dashur të kthehen në shtëpitë e tyre, nga rruga kryesore”, reagon Xhaferi.

Shqetësimi i gjithë kësaj situate alarmante, vijon më tej ai. “Pse duhet të jenë më të vlefshëm udhëtarët që shkojnë në Ohër, sesa banorët e fshatrave të Gostivarit?! Shtetit policor, dhunës dhe regjimit po u vjen fundi së shpejti, në tetor!”, shkruan Valdet Xhaferi.

/koha.mk