Mexhiti: VLEN-i do të nxjerrë kandidat edhe në Kërçovë

Koalicioni VLEN nuk përjashton mundësinë që javën e ardhshme të publikojë emrat e kandidatëve për kryetar komune. Zëvendëskryeministri i parë, Izet Mexhiti, thotë se emrat e të gjithë kandidatëve do të shpalosen përnjëherë, duke përfshirë këtu edhe kandidatin e Çairit. Mexhiti konfirmon se VLEN-i do të nxjerrë kandidat edhe në Kërçovë, si dhe në qytetin e Shkupit.

“Po bëjmë biseda. Me analizat e fundit, brenda VLEN-it. Besoj që ditëve në vijim, javën e ardhshme do t’i shpalosim kandidaturat për të gjitha komunat, përveç Strugës që e kemi shpalosur.”, – deklaroi zëvendëskryeministri i parë, Izet Mexhiti.

Mexhiti thotë se nuk do të mungojë mbështetja midis partnerëve të koalicionit qeveritar, sikurse edhe në bllokun opozitar, që nuk do të ekzistonte një përkrahje e tillë, thotë ai.

BDI: Zgjedhjet, referendum për orientimin evropian
Për BDI-në zgjedhjet do të jenë referendum për orientimin evropian të vendit, duke pasur parasysh, sipas tyre, ndikimet ruse në vend. BDI ka shpalosur tre emra të kandidatëve për kryetar komune: Çair, Tetovë dhe Zhelinë.

“Raporti më i fundit i miratuar nga Parlamenti Evropian e konfirmon zyrtarisht se Maqedonia e Veriut po ekspozohet gjithnjë e më tepër ndaj ndikimeve destabilizuese të Serbisë dhe Rusisë, pjesë e projektit gjeopolitik të ashtuquajtur “Bota serbe”. BDI kërkon menjëherë inicimin e një hetimi institucional dhe thirrjen e një debati urgjent në kuvend për të shqyrtuar këtë rrezik që ka kapur orientimin evropian të vendit.”, thuhet në kumtesën e BDI – së.

VLEN: Diplomacia e Osmanit, lidhje me “Botën serbe”
Nga koalicioni VLEN kanë hapur dilemat se ndikimet serbe janë instaluar nga ish-ministri për Punë të Jashtme, Bujar Osmani, i cili tani është nominuar për kandidat të BDI-së në Çair. Sipas VLEN-it, banorët e Çairit nuk meritojnë të udhëhiqen nga figura që krijojnë lidhje të fshehta me botën serbe.

/mrrt2