Do të rritet çmimi i autostradës Kërçovë – Ohër !

Kredia për përfundimin e autostradës Kërçovë – Ohër do të rritet, njoftoi sot kryeministri Mickoski, një ditë pas hapjes së pjesës prej 20 kilometrave. Autostrada Kërçovë – Ohër, e cila është në ndërtim e sipër për 11 vjet dhe fillimisht duhej të vihej në funksion në qershor të vitit 2018, është 57 kilometra e gjatë dhe ndërtimi deri më tani ka kushtuar pothuajse 600 milionë euro, shkruan Portalb.mk.

Ai nuk specifikoi saktësisht se sa do të jetë korrigjimi i ri në çmimin e autostradës, por si arsye përmendi stabilizimin e rrëshqitjeve të dheut.
“Ajo pjesë nga Vrbjani në Kërçovë është gjithashtu 17 kilometra e gjatë dhe duhet të përfundojë shtesë sepse ka 10 rrëshqitje dheu.

Ka edhe 6 rrëshqitje dheu në zonën pranë fshatit Botun, ato janë ndoshta më të mëdha dhe më sfiduese. Projektet janë tashmë gati, pres që zbatimi i tyre të fillojë në gusht. Për të gjitha këto për të cilat po flas, është e nevojshme rritje e kornizës së kredisë, sepse për fat të keq, kjo nuk ishte parashikuar në të kaluarën”, tha Hristijan Mickoski.

Sipas tij, nga aksi i plotë prej 57 kilometrash diku 34-35 deri në fund të gushtit do të jenë autostradë.
“Pa pesë kilometrat në Botun dhe pa pa 17 nga dalja e tunelit deri në Kërçovë, pres të përfundojnë deri në fund të 2026 ose e shumta, tremujori i parë i 2027,” tha ai.

Dje, 13 korrik 2025, u lëshuan në përdorim 20 kilometra të autostradës Kërçovë-Ohër edhe atë, nga fshati Vrbjani drejt Ohrit deri në fshatin Botun.

Më 1 prill 2025, afati për ndërtimin e autostradës Kërçovë-Ohër u zgjat edhe për tre vjet.
Ndërtimi i autostradës Kërçovë – Ohër filloi në shkurt të vitit 2014 dhe nga kompania kineze “Sinohydro”.

Gjatësia e trasës është 57 kilometra, ndërsa vlera fillestare e kontratës ishte 373 milionë euro. Afati fillestar për përfundim ishte qershori i vitit 2018, por punimet janë shtyrë disa herë për shkak të problemeve serioze inxhinierike, juridike dhe administrative. Pikërisht për shkak të këtyre problemeve, çmimi është rritur dhe tani arrin mbi 600 milionë euro.

Pse nuk ua shohim fundin ndërtimeve?
Lënda “Trajektoria”, foto nga Prokuroria Speciale Publike
Kujtojmë se Prokuroria Speciale Publike në maj të vitit 2017, ngriti procedurë gjyqësore në rastin e njohur si “Trajektorja” për larje parash dhe të shkeljeve gjatë procedurës së përzgjedhjes së kompanisë për ndërtimin e autostradës me kompaninë kineze “Sinohydro”.

Në këtë rast u akuzuan zyrtarët më të lartë të qeverisë së atëhershme, kryeministri Nikolla Gruevski, zëvendëskryeministri Vladimir Peshevski, ministri i Transportit Mile Janakieski, dhe drejtori i atëhershëm i Ndërmarrjes Publike për Rrugë Shtetërore, Ljupço Georgievski.

Sipas aktakuzës së PSP-së, të lartpërmendurit, në gjysmën e dytë të vitit 2012 dhe në vitin 2013 kanë ndërmarrë aktivitete për zgjedhjen e një ndërmarrje për ndërtim të autostradës Milladinovc – Shtip – Kërçovë – Ohër, dhe i kanë shfrytëzuar dhe tejkaluar autorizimet e tyre. Sipas aktakuzës, thuhet se ata e kanë dëmtuar buxhetin shtetëror për 155 milionë euro.
Por, me ndryshimet në Kodin Penal kjo lëndë u vjetërsua, ndaj dhe të pandehurit nuk do të mbajnë përgjegjësi.

/portalb