Tragjedia në Koçan! Opozita e pakënaqur me hetimet..!?
Në seancën për pyetje deputetësh në Kuvend, tema kryesore ishin hetimet për zjarrin që shpërtheu në diskotekën PULSE në Koçan. Nga LSDM kërkojnë përgjigje nga Toshkovski pse në hetime nuk janë përfshirë funksionarë aktualë të Ministrisë së Punëve të Brendshme, të cilët siç thonë, nuk kanë vepruar për të parandaluar tubime në kabarenë, ndërsa në natën e tragjedisë, ishin mbledhur rreth 650 persona. Sipas deputetit Mile Talevski, MPB mbron njerëzit e afërt me VMRO-DPMNE-në.
“Ja shihni fotografinë, kjo tregon gjithçka! Tomo Donev, epror i policisë kriminalistike të Koçanit, prezent në ngjarje partiake të VMRO-DPMNE-së në Koçan. Edhe përskaj asaj se e dimë që sipas ligjit për punë të brendshme, zyrtarët policorë nuk guxojnë të marrin pjesë në ngjarje politike dhe nuk guxojnë të jenë anëtar të partive politike”, u shpreh Mile Talevski – LSDM.
Ministri i brendshëm Pançe Toshkovski, u përgjigj se për tragjedinë ka procedurë hetimore për 34 persona, përfshirë anëtarë të VMRO-së, të LSDM-së, e të BDI-së. Rikujton LSDM-në, se në tragjeditë e mëparshme, MPB nuk kishte ngritur asnjë kallëzim penal.
“Duhet ta dijë opinioni i Maqedonisë se për Llaskarcën ka pasur zero kallëzime penale të ngritura, zero njerëz të procesuar në korniza të procedurës nga ana e MPB-së. Fakt i pa kontestueshëm! Ja ku është raporti, fakt i pa kontestueshëm. Për BESA TRANS, rastin që ndodhi në Bullgari, zero kallëzime penale! Qeveria juaj! Ministria e juaj për punë të brendshme! Zero njerëz të akuzuar, gjegjësisht më falni, të dyshuar nga ana e Ministrisë së Punëve të Brendshme. Edhe për spitalin modular, përsëri zero njerëz. Zero, zero!”, tha Pançe Toshkovski – Ministër i Brendshëm.
Se MPB nuk ka vepruar në mënyrë të drejtë kur ngriti kallëzimet penal, akuzojnë edhe nga BDI. Deputeti i kësaj partie, Blerim Bexheti, thotë se derisa i tërë zinxhiri i institucioneve ka dështuar në detyrat e saja, Qeveria fokusohet vetëm te funksionarë të qeverisë së kaluar. Si nga LSDM, ashtu edhe nga BDI, për arsye morale kërkojnë dorëheqje nga ministri Toshkovski.
/Alsat.mk
