BDI e Ali Ahmetit si PDSH e Menduh Thaçit! Ja kush e thotë..!?

Reagimet e fundit të BDI kinse kundër margjinalizimit të shqiptarëve në sektorin e sigurisë dhe të mbrojtjes si dhe kërcënimi i Ali Ahmetit për bojkotimin e zgjedhjet vendore nëse shfuqizohen nene të kontestuara të Ligjit për përdorimin e gjuhëve, ndihmojnë për të kuptuar më qartë pozicionin e kësaj partie në skenën politike në vend.

Këto veprime politike dëshmojnë se BDI ka dështuar të ndërtojë një strategji serioze politike si parti opozitare, e cila forcon pozicionin e tyre në shoqëri dhe krijon parakushte për rikthimin eventual në qeveri apo edhe ti fitonin zgjedhjet lokale. Thjeshtë, Ali Ahmeti ka humbur kompasin politik dhe me apo pa vetëdije është duke punuar në dëm të vetvetes dhe në të mirë të kundërshtarëve të tij politik.

Gabimi kapital i BDI-së ishte se nënçmoi VMRO. Më kot shpresuan se me Mickovskin do të mund ta reprizojnë lojën gjatë qeverisjes me Gruevskin, kur ditën hiqeshin si armiqë të përbetuar, ndërsa natën si vëllezër ndanin plaçkën e pushtetit. Këtë strategji perfide Gruevski dhe Ahmeti e kanë zbatuar gjatë bashkëqeverisjes nga viti 2008 deri në vitin 2017, kur VMRO humbi pushtetin.

Kur u bë e qartë se Mickovski do të formojë qeverinë me koalicionin e partive opozitare shqiptare, BDI reagoi me nervozizëm duke kontestuar legjitimitetin e Vlenit për të përfaqësuar shqiptarët në qeveri.

Kretët e BDI-së më kot shpresuan se duke shantazhuar VMRO me destabilizimin e vendit do ta detyrojnë Mickovskin të ndërrojë mendje. Doli që Mickovski qenkësh kockë më e fortë sesa që e menduan si djalosh i rritur me gurabia dhe keksa.

Thjeshtë nuk e kuptuan se kohët kanë ndryshuar, se nuk mund të përsëritet skenari i njejtë i vitit 2001, përmes destabilizimit të rrëmbehet pushtetin. E nënçmuan faktin se Maqedonia e Veriut tashmë është anëtare e NATO-s dhe se faktori ndërkombëtarë me asnjë çmim nuk do të lejojë destabilzimin e vendit. SHBA dogjën çadrat e BDI para Gjykatës kushtetuese duke e shpallur njeriun më të besuar të Ali Ahmetit, Artan Grubin, persona non grata për shkak të dyshimeve të bazuara për përfshirjen në korrupsion të lartë.

Pas shuplakës amerikane, në vend që BDI të korigjojë sjelljen e saj, u bë sikur nuk i kupton mesazhet e ndërkombëtarëve. U përpoq që përgjegjësinë për dështimet e veta dhe të shqiptarëve për moszbatimin e Marrëveshjes së Ohrit, t’ua adresojë ndërkombëtarëve duke dërguar letra dhe apele kinse për t’i përkujtuar për përgjegjësitë e tyre për zbatimin e Marrëveshjes së Ohrit. Përgjigja që erdhi nga andej ishte injorim i plotë. Askush nga ndërkombëatrët nuk mori mundimin të paktën t’u përgjigjen letrave të tyre. Mesazhi është i qartë, BDI më nuk trajtohet si partner serioz i faktorit ndërkombëtarë.

Retorika naive nacionaliste e BDI-së i dha hovë nacionalizmit maqedon, që kulmoi me moton zgjedhore të VMRO, Maqedonia sërish e jotja. Kjo i solli fitore bindëse VMRO-së, rezultat që dërgoi në opozitë BDI-në dhe Ali Ahmetin në pension politik.

Nacionalizimi i rrejshëm i BDI e çoi ujin në mullirin e Mickovskit, i cili fitoi bindshëm zgjedhjet parlamentare. Ky veprim i gabuar që forcoi VMRO dhe duke dobësuar LSDM, minoi shanset që partitë shqiptare të kenë pozicion më të mirë gjatë bisedimeve për formimin e qeverisë së re. Nga kalkulimet e gabuara partiake, jo vetëm që dogjën veten, por edhe rrënuan pozitën e opozitës shqiptare për të sigurar pozicion më të fuqishëm në qeveri. Tani për të shpëtuar kokën e tyre, janë të gatshëm të flijojnë çdo interes partiak dhe shqiptar.

Kur e kuptuan se letra e destabilizimit për tu rikthyer në pushtet u dogj, krerët e BDI reaguan me panik duke ndryshuar retorikën politike për 180 shkallë. Nisën ti vardisen hapur Mickovskit duke premtuar mbështetje për projekte të ndryshme ligjore në Kuvend. Kjo edhe më tepër i komprometoi sepse u kuptua hapur se retorika paraprake nacionaliste paska qenë e pasinqertë.

Tani janë të gatshëm ti nënshtrohen Mickovskit vetëm të mos përndiqen për keqpërdorimet evetuale gjatë 22 viteve pjesëmarrje në qeverisje. VMRO edhe mund të mëshirojë një pjesë të kreut të BDI, por kjo do të shkaktojë përçarje në parti, kur do të nisë vala e arrestimeve të ish funksionarëve nga eshallonet më të ulta. Ato nuk do të mund ti shpëtojnë as militantët e tyre në gjykata dhe prolkurori sepse Mickovski është i vendosur të shkarkojë Prokurorin Kocevski dhe një pjesë të anëtarëve të Këshillit gjyqësorë.

BDI nuk do të përfirojë shumë as nga kritikat e ashpra kundër partive shqiptare në qeveri. Ajo nuk vështrëson aq pozitën e Vlenit, por dobëson interesin shqiptar në qeveri. Duke e prezentuar Vlen si vazal të VMRO-së, nuk përfiton sepse shqiptarët ende i kanë të freskëta kujtimet nga qeverisja e BDI-së për 22 vite. Saherë që do të kritikojnë për ndonjë dështet e qeverisë menjëherë do të marrin përgjigje me fakte nga Vlen se në kohën e tyre ka qenë njeësoj, bile ndoshta edhe me keq. Por kjo përplasje publike mes BDI dhe Vlenit nuk u ndihmon shqiptarëve, por vetëm forcon rejtingun e VMRO, e cila në sytë e opinionit maqedon do të duket si parti që di ti disciplinojë shqiptarët.

Nëse vërtet BDI kujdeset për anëtarësinë e saj dhe shqiptarët në përgjithësi urgjentisht duhet të ndërrojë strategjinë e veprimit. Duhet të kuptojnë se kundërshtari i vërtet politik është VMRO, e jo Vlen. Me reotirik boshe nacionaliste vetëm forcon pozicionin e kryeministrit Mickovski dhe dobëson pozicionin e vetë dhe të shqiptarëve.

Kritika e BDI-së duhet të përqëndrohet në pikat që bashkojnë faktorin shqiptarë, siç janë eurointegrimet, reforma në drejtësi dhe lufta kundër krimit. Nga kjo agjendë fitojnë të gjithë, BDI, Vlen, shqiptarët, të gjithë qytetarët e Maqedonisë së Veriut. Humbin vetëm forcat që për 32 vjetë pengojnë integrimin e Maqedonisë së Veriut në Bashkimin Evropian, gjyqësorin e kanë shëndruar në noter të pushtetit ekzekutiv, ndërsa korrupsionin në sistem qeverisje për kontrollin e njerëzve.

Por si duket BDI nuk mund ta shtyjë këtë agjendë për shkak se janë shëndruar në peng të një grusht njerëzish në krye me Ali Ahmetin. Nëse brenda në këtë parti nuk ka masë kritike politikanësh të rinj, që do të dëbonin nga selia e partisë Ali Ahmetin dhe 40 hajdutët, fatëkeqësisht, BDI do të pësojë fatin e PDSH-së së Menduh Thaçit, baba i përhershëm i opoziës!
Shkruan Naser SELMANI

/almakos