URIME: 30 vjet Universiteti i Tetovës! Shënohet përvjetori i ligjëratave të para..

Duke filluar me homazhe te varri i dëshmorit të Universitetit të Tetovës UT-së, Abdylselam Emini dhe te busti i rektorit të parë, Fadil Sulejmani, e më pas duke bërë edhe vizitat tek xhamia e fshatit Poroj, në mejtepin e të cilës u mbajt ligjërata e parë, Universiteti i Tetovës, shënoi 30 vjetorin e ligjëratave të para.

Manifestimi ka vazhduar me akademinë solemne në universitet, ku edhe janë dekoruar dekanët e parë të fakulteteve të krijuara atë kohë si dhe pronari i shtëpisë në Reçicë të Vogël ku edhe u nënshkrua akti i themelimit të UT-së.

“Sot kujtojmë një nga momentet më kulmore në historinë tonë kombëtare e akademike, fillimin e ligjëratave të para në Universitetin e Tetovës. Ky institucion lindi si rezultat i vizionit përparimtar dhe vendosmërisë së atyre që besuan se dija dhe arsimimi në gjuhën shqipe janë themelet e progresit dhe identitetit tonë kombëtar.

Nuk ishte një rrugë e lehtë por ishte një rrugë e domosdoshme që sot frymëzon gjenerata të reja drejt dijeve dhe sukseseve akademike. Universiteti i Tetovës u ngrit mbi idealin e lirisë dhe barazisë duke u bë një vatër e shkëlqyeshme e kulturës dijes dhe zhvillimit shoqëror. Ky universitet nuk është vetëm një institucion arsimor, por edhe një simbol i qëndresës dhe vullnetit tonë për të ruajtur dhe zhvilluar gjuhën kulturën dhe identitetin tonë kombëtar”, tha Jusuf Zejneli.

/TV21