Netanjahu: Marrëveshja është arritur, e firmosim sot..

Kabineti i sigurisë në Izrael do të takohet sot për t’i dhënë aprovimin final ujdisë me grupin militant të Hamasit për armëpushim në Gaza dhe lirimin e pengjeve. Kryeministri Izraelit Benjamin Netanjahu konfirmoi se marrëveshja është arritur, pasi u tejkaluan edhe mospajtimet e fundit me Hamas.

Mes ndasive të thella në kabinet, Izraeli e shtyu takimin gjatë së cilit do të votohej pakti, duke fajësuar Hamasin për këtë. Por më vonë, Netanjahu u informua nga ekipet negociuese se mosmarrëveshjet që kishin të bënin me lirimin e pengjeve dhe të burgosurve palestinezë u sheshuan.

Por teksa armëpushimi pritet të hyjë në fuqi të dielën, banorët e gazës vijojnë të përjetojnë orë dramatike. Avionët izraelitë kanë vazhduar sulmet intensive, me autoritetet palestineze që thonë se mbi 100 persona përfshirë, 27 fëmijë dhe 31 gra janë vrarë gjate 2 ditëve te fundit, dhe 264 të tjerë janë plagosur.

Sulmet ajrore kanë goditur një sërë zonash rreth Gazës edhe mëngjesin e së premtes. Zëdhënësi i Shtëpisë së Bardhë, John Kirby tha se Uashingtoni beson që armëpushimi për konfliktin 15 mujor, do të fillojë të implementohet që këtë fundjavë.

/alsatm