Rrëfimi i një aventurieri Kërçovarë me biçikleta dhe frymëzimi i tijë..

Në një botë ku përditshmëria shpesh shndërrohet në një garë të lodhshme me kohën, disa njerëz gjejnë mënyra të jashtëzakonshme, krejtësisht të tjera, kreative, të lodhshme, “të çmendura” për të rifituar qetësinë dhe frymëzimin. Kujtim Zendeli, i njohur mes alpinistëve dhe miqve si Nomad Bozo, është një prej tyre.

I lindur në Kërçovë të Maqedonisë së Veriut, Kujtimi e ka bërë pasionin për alpinizmin dhe çiklizmin një mënyrë jetese, duke sfiduar kufijtë e tij dhe duke arritur majat më të larta të Evropës dhe më gjerë. Për të, malet nuk janë thjesht destinacione; ato janë vende ku shpirti ndien lirinë, ndërsa çdo hap e afron më pranë thelbit të vetes.

Në këtë intervistë për Albinfo.ch, Kujtimi ndan rrëfimet e tij për pasionin që e çon drejt lartësive, për sfidat e jashtëzakonshme që e kanë formësuar, dhe për mesazhin frymëzues që dëshiron të përcjellë te të tjerët.

Albinfo.ch: Kujtim, si filloi pasioni yt për alpinizmin dhe çfarë të tërhoqi drejt këtij sporti ekstrem?
K. Zendeli: Pasioni im për alpinizmin filloi krejt natyrshëm. Në fillim ishin ecje të thjeshta për të larguar stresin e përditshëm dhe për të gjetur qetësinë shpirtërore. Por me kalimin e kohës, këto ecje u kthyen në një dashuri të madhe për ngjitje maja malesh dhe për natyrën. Dëshira për të eksploruar më shumë, për të shkuar më lart dhe për të sfiduar veten më shtyu drejt alpinizmit ekstrem. Malet të sfidojnë jo vetëm fizikisht, por edhe mendërisht dhe shpirtërisht, dhe kjo është ajo që më tërheq më shumë.

Albinfo.ch: Ngjitjet tuaja shpesh mbartin një dimension shpirtëror. Si ndikon alpinizmi në jetën dhe filozofinë tuaj?
K. Zendeli: Alpinizmi është më shumë se një sport për mua; është një udhëtim shpirtëror. Në majë të malit ndihesh i vogël përballë madhështisë së natyrës, por njëkohësisht ndjen një lidhje të thellë me gjithçka përreth. Është një moment reflektimi dhe qetësie, ku harron çdo shqetësim dhe përqendrohesh te forca e shpirtit. Ndjenjat që përjeton – lodhja, krenaria, aventura – të kujtojnë se jeta është një sfidë që ia vlen të përballohet me pasion.

Albinfo.ch: Gjatë ngjitjes në Dolomite, ia dedikuat këtë arritje mikeshës suaj Luljeta Ademit me moton “Sa ka jetë, ka shpresë”. Si ndikoi kjo në motivimin tuaj?
K. Zendeli: Dolomitet janë një vend i veçantë për çdo alpinist. Për mua, kjo ngjitje ishte më shumë sesa një sfidë personale. Ishte një mënyrë për t’i dhënë kurajë mikeshës sime të ngushtë, Luljeta Ademi, e cila në atë kohë po përballej me një betejë të madhe për shëndetin e saj. Motoja “Sa ka jetë, ka shpresë” ishte një frymëzim i madh për mua gjatë gjithë ekspeditës. Kur e ndava këtë arritje me të, ndjeva që kisha bërë një gjest të vogël, por domethënës për t’i dhënë forcë dhe shpresë për ta rikthyer Luljetën sërish mes maleve, atje ku i përket shpirti i saj luftarak për të mos u dorëzuar kurrë. Një ditë kur të bëhet mirë shkojmë i ngjisim bashkë!

Albinfo.ch: Përveç alpinizmit, jeni i pasionuar pas çiklizmit. Si ndihmon ky sport në përgatitjen tuaj për ekspeditat malore?
K. Zendeli: Çiklizmi është një pjesë e pandashme e jetës sime. Përveçse më ndihmon fizikisht për t’u përgatitur për ngjitjet malore, është gjithashtu një mënyrë për të zbuluar vende të reja dhe për të qëndruar i lidhur me natyrën. Një nga sfidat më të mëdha që kam përjetuar ishte udhëtimi im 4,000 kilometra me biçikletë nëpër Italinë qendrore dhe jugore. Ky udhëtim jo vetëm që më përgatiti fizikisht për ngjitjen në Mont Blanc, por më sfidoi të organizoj gjithçka vetë – nga itinerari deri te vendet e ndalesave dhe ushqimet. Ishte një përvojë që më mësoi disiplinë dhe durim.

Albinfo.ch: Cilat janë momentet më të vështira që keni përjetuar gjatë ngjitjeve dhe si i përballoni ato?

K. Zendeli: Kur je në mal, përballesh me rreziqe dhe momente kritike që mund të jenë kërcënuese për jetën. Këto situata kërkojnë qetësi dhe një aftësi të jashtëzakonshme për të menduar qartë. Për mua, frika nuk ekziston, por kujdesi dhe vëmendja janë gjithmonë të pranishme. Në ato momente, fokusohem te zgjidhjet dhe strategjitë për të tejkaluar situatën, duke mbajtur gjithmonë një qasje të qetë dhe të kontrolluar.

Albinfo.ch: Cilat janë disa nga përvojat më të paharrueshme në majat e larta të Evropës dhe cili është synimi juaj i radhës?
K. Zendeli: Çdo ngjitje ka historinë e vet unike. Nuk do ta harroj kurrë ekspeditën 20-ditore në Alpet shqiptare, ngjitjen në Trigllavin e Sllovenisë, apo aventurat në Karpatet e Rumanisë dhe Dolomitet italiane. Secila majë ka sjellë sfida dhe bukuri të veçantë. Për të ardhmen, kam në plan të ngjitem në maja të tjera të rëndësishme, duke vazhduar të eksploroj dhe të sfidoj veten.

Albinfo.ch: Si i motivoni të rinjtë që të angazhohen në alpinizëm dhe sporte malore?
K. Zendeli: Të rinjve u them: natyra është vendi ku mund të gjeni veten dhe të rifitoni energjinë shpirtërore. Alpinizmi nuk është vetëm një sfidë fizike, por edhe një mënyrë për të zbuluar forcën tuaj të brendshme. Filloni me hapa të vegjël, eksploroni vendet e afërta dhe mësohuni të respektoni natyrën. Kjo rrugë nuk është vetëm një sport, por një mënyrë për të parë botën ndryshe dhe për të ndërtuar një lidhje të fortë me të. Edhe lexoni sa më shumë, sporti ju ushqen trupin, leximi ju ushqen mendjen dhe shpirtin!

Me çdo ngjitje dhe çdo pedalim, ai dëshmon se kur shpirti është i lirë, çdo kufi mund të tejkalohet. Kujtim Zendeli- Nomad Bozo është një model frymëzimi për ata që kërkojnë të tejkalojnë kufijtë personalë dhe të përqafojnë natyrën si një burim paqeje shpirtërore dhe mundi fizik. Çdo ngjitje dhe çdo kilometër e shkelur tregon historinë e një njeriu që nuk ndalet para asnjë sfide dhe që beson se gjithçka është e mundur kur ka pasionin dhe përkushtimin. Malet janë për të një simbol i forcës, shpresës dhe përjetimit të thellë të jetës – një frymëzim për të gjithë ne që kërkojmë të zbulojmë kuptimin e vërtetë të aventurës.

/albinfo