Kryetari Fatmir Dehari uron vitin e ri

Të dashur qytetarë,
Dëshiroj t’ju shpreh mirënjohjen time të thellë për mbështetjen, besimin dhe bashkëpunimin që keni treguar përgjatë gjithë këtij viti.

Jemi në prag të përfundimit të vitit 2024, një vit plot sfida, përpjekje dhe përkushtim për të qëndruar në ballë të çdo situate, qoftë ajo e krijuar nga njeriu apo natyra. Edhe pse kemi përballuar pengesa të shumta, përfshirë vështirësitë në realizimin e pritshmërive dhe sfidat e tjera, angazhimi ynë ka mbetur i palëkundur!

Me gjithë arritjet e rëndësishme, disa projekte të nisura nuk janë përmbyllur siç kemi dëshiruar. Por kjo nuk na dekurajon; përkundrazi, na motivon që në vitin 2025 të punojmë edhe më me përkushtim për përmbushjen e amaneteve dhe kërkesave tuaja.

Ne besojmë se puna jonë e sinqertë flet më shumë se fjalët, dhe ky do të jetë gjithmonë parimi ynë udhëheqës. Ju siguroj dhe zotohem se do të vazhdojmë të punojmë me përkushtim për zhvillimin e komunës sonë dhe për mbrojtjen e të drejtave të qytetarëve tanë, në çdo nivel.

Falënderoj nga zemra mërgimtarët tanë të dashur. Ju jeni ambasadorët tanë kudo në botë, shtyllë e rëndësishme e zhvillimit të Kërçovës dhe ne jemi krenarë për lidhjet e forta që ruajmë pavarësisht largësisë.

Në emrin tim dhe të gjithë ekipit tim, ju uroj një vit të ri plot shëndet, mirëqenie dhe suksese!
Gëzuar vitin 2025!

/ms