Si do të ndalojë qeveria ikjen e e mjekëve drejt Europës..?

Maqedonisë i nevojiten së paku 1000 mjekë urgjentisht dhe pa vonesa, të paktën deri në fund të vitit të ardhshëm. Qeveria ka marrë vendimi që për të tejkaluar situatën emergjente të punësohen 600 specializantë – 300 deri në fund të këtij viti dhe të tjerët vitin e ardhshëm.

Mungesën e personelit mjekësor në institucionet e shëndetit publik në vend ministri i Shëndetësisë, Arben Taravari e ka deklaruar me shifra, në një prononcim për Zërin e Amerikës.

“Të gjithë ata janë kandidatë potencialë për të ikur nga vendi. Shpresoj që vitin e ardhshëm të gjejmë një zgjidhje, përveç 300 specializantëve, të punësojmë rreth 300-400 mjekë, gjë që do të na mundësojë të kemi njëfarë qëndrueshmërie të spitaleve, sidomos në brendësi të vendit”, ka thënë ministri.

Mungesa e personelit mjekësor, specialistë, infermierë…, është kthyer në një “sëmundje kronike” vitet e fundit. Largimet e vazhdueshme dhe masive të profesionistëve shëndetësorë nga Maqedonia në vendet evropiane e kanë çuar shëndetësinë në një situatë ku nuk mund t’i përgjigjet në mënyrë cilësore nevojave të qytetarëve. Muaj pritje për një kontroll specialisti, analiza, ndërhyrjeje kirurgjikale.

Sesi është situata, të paktën deri në fund të vitit 2023, pasqyrohet në publikimi vjetor “Rrjeti i Institucioneve Shëndetësore Spitalore për vitin 2023”, përgatitur nga Instituti i Shëndetit Publik. Në nivel rajonal numri i mjekëve 2069, ku mesatarisht një mjek i bie të kujdeset për 4.2 shtretër (pacientë). Mesatare kjo që është dyfish më e lartë në rajone ku numri i personelit mjekësor është më i vogël.

Mesatarja në rajonin e Shkupit është 1 mjek – 3.5 shtretër, ndërsa në atë të Vardarit 1 mjek – 8,1 shtretër (pacientë). Sa i takon rajonit të Shkupit, në Klinikën universitare – në Kirurgjinë torakale dhe vaskulare 1 mjek- 5.5 shtretër, më të ngarkuar janë mjekët tek Sëmundjet e Kirurgjia digjestive ku 1 mjek ka – 4.9 shtretër (pacientë), Onkologjiku, Pediatria 1 mjek – 4.4 shtretër, apo Instituti i sëmundjeve të mushkërive me 1 mjek – 7 shtretër (pacientë).

Përveç mjekëve, largimet edhe më të mëdha kanë qenë tek infermierët, largimet masive të të cilëve rinisën pas periudhës së Kovidit. Sipas të dhënave zyrtare në vitin 2022 kishte 112 infermierë më pak krahasuar me një vit më parë. Shkalla e këtij personeli për 100.000 banorë është dukshëm nën mesataren e BE-së (BE ka 577 infermierë për 100,000 banorë), vetëm 515 infermierë për 100 mijë banorë.

E ndërsa deficitet në spitale thellohen, katedrat e mjekësisë i plotësojnë çdo vit kuotat e studentëve, që në afatin e parë të regjistrimit, duke bërë që fakultetet e shkencave të mjekësisë, infermierisë…, të jenë degët më të preferuara. Ekspertët pohojnë se migrimi i personelit mjekësor është një trend global, por shteti duhet të përpiqet ta frenojë, sidomos kur politikat e vendeve të tjera për pranimin e mjekëve dhe infermierëve janë liberalizuar.

/(koha.mk)