Gjuha shqipe përplas Ahmetin dhe Mickoskin..!?

Ligji për përdorimin e Gjuhëve dhe vendimet që duhet të marrë Gjykata Kushtetuese në lidhje me disa pjesë të ligjit kanë përplasur liderin e BDI-së, Ali Ahmeti dhe kryeministrin Hristijan Mickoski, përcjell TV21. Ahmeti thotë se nuk dëshirojnë destabilizim të shtetit, por që nëse preket gjuha shqipe, do të reagojnë.

“Po u prek gjuha shqipe, sot me u prek, ta dinë që sheshet e Shkupit do të jenë plot e përplot. Unë nuk e di si të paralajmëroj. Ne nuk prodhojmë krizë, destabilizim nuk i krijojmë shtetit, por nëse shteti do destabilizim unë po e paralajmëroj: Preke gjuhën shqipe, preki të arriturat e shqiptarëve, garanca nuk ke nga unë”, deklaroi mbrëmë Ahmeti.

E kreu i ekzekutivit, Hristijan Mickoski thotë se publiku është mësuar që Ahmeti, “me retorikë luftarake, të thërret në trazira dhe jostabilitet”. Sipas tij, këto thirrje të Ahmetit nuk do të shkaktojnë efektin që dëshiron kreu i integristëve.

“Ligji për Përdorimin Gjuhëve është në Gjykatën Kushtetuese, sepse atje nëse shikoni, do t’i shihni njerëzit që kanë dalë prej tefterit në Reçicë të Vogël dhe në “Bihaçka”, supozoj që presioni ndaj atyre njerëzve vazhdon, tani kërkohet proksi, kërkohet ndonjë strukturë transmetimi që të dërgohet mesazhi, por nuk mendoj që është diçka serioze, por sido që të jetë, ai vazhdon të jetë faktor destabilizimi, kjo mua më shqetëson, por edhe partnerët tanë ndërkombëtarë që z. Ali Ahmeti dhe BDI në bazë ditore po bëhen më shumë faktor të jostabilitetit”, deklaroi Mickoski.

/tv21.tv