Gjermani: Kosovari dënohet me gjashtë vjet e gjysmë burg për tentativë vrasje dhe armëmbajtje pa leje..

Pas vrasjes së një menaxhuesi bari në qendër të Dyseldorfit në fund të prillit, gjykata e rrethit e dënoi autorin me gjashtë vjet e gjysmë burg

Gjykata gjermane supozoi se dy nga katër të shtënat e para u qëlluan nga 52-vjeçari për vetëmbrojtje, pasi viktima kishte nxjerrë armën.

Për shkak se babai i tre fëmijëve qëlloi edhe dy të shtëna në drejtim të viktimës që tashmë ishte shtrirë në tokë, ai u dënua me gjashtë vjet e gjysmë burg për tentativë vrasje dhe armëmbajtje pa leje. „Të shtënat nuk mbuloheshin më nga situata e vetëmbrojtjes“, tha gjyqtari kryesues Rainer Drees.

Mbeti e paqartë se cila nga katër të shtënat ishte fatale, shkruan „TAG24“, transmeton portali Shtegu. “Prandaj, nuk mund të përjashtonim që pronari i lokalit 38-vjeçar të ishte tashmë i vdekur kur u qëlluan dy të shtënat e fundit”.

Për këtë arsye, 52-vjeçari nuk është dënuar për vrasje nga pakujdesia siç akuzohet, por “vetëm” për vrasje të mbetur në tentativë, sipas parimit “kur ka dyshime për të pandehurin”.

Të dy burrat ishin partnerë biznesi. 52-vjeçari nga Kosova dëshmoi se më herët ka pasur një mosmarrëveshje për një lojë ilegale me zare që viktima vazhdonte ta luante pas shpine pa të.

Menaxhuesi 38-vjeçar i lokalit më pas nxori fillimisht një armë, tha ai. Dëshmitarët mbështetën versionin e tij të historisë.
Pranë viktimës në vendin e krimit është gjetur një armë. „Bazuar në deklaratat e dëshmitarëve, ne nuk mund të përjashtonim që hanxhiu tërhoqi një armë i pari“, tha gjyqtari Rainer Drees. Vrasësi ka qëndruar në vendngjarje derisa ka mbërritur policia dhe ka lejuar veten të arrestohet pa rezistencë.

Prokurori publik kishte kërkuar dhjetë vjet burg për vrasje. Mbrojtja kishte kërkuar shpalljen e pafajësisë në bazë të vetëmbrojtjes dhe maksimumi pesë vjet burg nëse dënohej për tentativë për vrasje.

/shtegu